Anda Uldum politikkimit tunuarpoq
Demokraatit siulittaasortaassapput, Anda Uldum ilaquttani isumasioreerlugit aalajangermat Danmarkimut nuunniarluni. Siulittaasortaassaq kiisalu siulersuisortaassat februaarip 13-iani 2016 nuna tamakkerlugu immikkut ittumik ataatsimiinnermi qinerneqassapput. Demokraatit taama allapput.
Anda Uldum politikkimi akisussaaffimminit tamanit tunuarpoq, Danmarkimut nuugajalerneq pissutigalugu. Anda Uldumip nulia Danmarkimi ilinniarluni aallartippoq ulloq 1. februar, Anda Uldumilllu kissaatigaa nuliani ilagissallugu.
Aamma atuaruk Uldum stressernini pissutigalugu sulinngiffeqarallalersoq
- Ilaquttakka tamatigut salliujuaannartussaapput. Nuliara ukiorpaalussuit imminut tunulliunnikuuvoq uanga politikkikkut sulininni tapersersorumallunga. Maannakkullu uanga utertitsisussanngorpunga taamaattumik Danmarkimut nooqatiginissaanut aalajangernissara oqittunnguusimavoq, oqarpoq Anda Uldum nangillunilu:
- Politikkimi sulivunga nuannersumik ukiorpaalunni tamannalu pillugu suleqatigisimasakka akerlerisakkalu qutsavigerusuppakka piffissaq pissanganartoq atorsimasarput pillugu. Kikkut tamaasa kissaappakka ingerlalluarnissaannik.
Anda Uldum Demokraatini 2014-imi marsip qaammataani siulittaasunngorpoq. 2014-mi ukiakkut qinersinermi partii angusarissaarluni qineqqusaarmat siuttuuvoq Inatsisartunilu partiip ilaasortaatitai marloriaatinngortillugit aamma tamatuma kingorna maannakkut Naalakkersuisuusunut partii ilaalerpoq. 2015-mi oktobarip naalerneraniit sulinngiffeqarpoq stressernini pissutigalugu.
