Naalakkersuisut nikinnerat illuatungiliuttuninngaanniit apeqquserneqarpoq

Naalakkersuisut nikititerneranut piffissaliussaq partiit illuatungiliuttunit apeqquserneqarpoq.

Randi Vestergaard Evaldsen aningaasaqarnermut aatsitassanullu ippassaq marlunngornermi naalakkersuisunngormat, naalakkersuisoqarfiit taakku Demokraatimik naalakkersuisoqaqqilerput.

Andreas Uldumilli partiip siulittaasuattut tunuarnerata kingorna Demokraatit suli siulittaasoqanngillat.

Randi Vestergaard Evaldsenilu siulittaasunngussanngippat naalakkersuisoq taarserneqassasoq, Partii Naleqqamit ilimagineqarpoq.

- Randi Vestergaard Evaldsenimut unammillertut marluk Justus Hansen taavalu Poul Hansen, taakkua siulittaasunngussagaluarunik qularnanngitsumik naalakkersuisoqatigiinni malinnaalluarnissaq tunaartaralugu, naalakkersuisoqarfinnut arlaannut ingittariaqassapput taamaasissappallu aamma naatsorsuutigisinnaavarput, taava Randi Vestergaard Evaldsen tunuartariaqalissaaq. Taamaammat taannartaa naapertuutinngitsorujussuuvoq, Partii Naleraq sinnerlugu Inatsisartunut ilaasortaq, Per Rosing-Petersen oqarpoq.

Aamma atuaruk Naalakkersuisut nikititernerini Randi killitsisimaartoq Vittulu oqiliallassimaartoq

Partiit illuatungiuttut aappaannit Inuit Ataqatigiinnit tikkuarpaat, Naalakkersuisoqatigiit aatsaat nikitsitinngimmata. Tassami Andreas Uldumip tunuarnerata siuliani Doris Jakobsen peqqissutsimut naalakkersuisuulluni  aamma sulinngiffeqarallarnikuusoq, Aqqaluaq B. Egede eqqaasitsivoq.

- Pisariaqavissumik nikititerinissaq pisinnaavoq, kisiannilu aamma manersuunneqartariaqarpoq. Qinigaaffik aatsaat aallartippoq, nikititerinerillu naliginnaasunngussanngimmat, Aqqaluaq B. Egede oqarpoq.

Partii Naleraq Demokraatit iluminni suliassaannut akuliussanngitsoq, Demokraatini siulittaasunngorniarluni sassartoq alla, Justus Hansen, oqarpoq.

Taamaattoq Randi Vestergaard Evaldsen siulittaasutut qinigaanngikkaluarpat, aningaasaqarnermut nutaamik naalakkersuisoqalersinnaasoq, Justus Hansen oqarpoq.

- Taamanikkussaq kina siulittaasunngussanersoq nalunarunnaarpat paasinarsiumaarpoq, Justus Hansen oqarpoq.

Taassuma aamma oqaatigaa naalakkersuisoqarfinnik tunniussineq maanna pisariaqarsimasoq, Andreas Uldumip sulinngiffeqarnera naammassimmat.

Demokraatit immikkut ittumik sapaatip akunnerata tulliani ataatsimeersuassapput, siulittaasussamik tassani qinersisoqassalluni.

Aamma atuaruk Demokraatini siulittaasussat sassartut ataatsimik ilapput