Kulturi

Inuit arfinillit Carl Egedep Aningaasaateqarfianit nersorniarneqarput

Carl Egedep Aningaasaateqarfiata siulersuisui ukioq manna decembarip ulluisa tallimaanni ataatsimiipput, aalisartullu piniartullu utoqqalisut, aalisartutullu inuutissarsiornermi maligassiuisunut nersorinninniarput, angutillu arfinillit nersornaaserneqarput, tamarmillu 10.000 koruuninik aningaasartaqarlutik.

Allattoq Aaqqissuisoqarfik / Redaktionen

decembarip 22-at 2019 15:51

Inunnut Kalaallit Nunaanni najugaqartunut tassaniluunniit najugaqarsimasunut ikiorsiisarnissaq aningaasaateqarfiup siunertaraa ukuusunut:

Aalisartut piniartullu ajunaarsimasut kinguaavinut, aalisartutut piniartutullu inuutissarsiornermi maligassiuisunut, aalisartunut piniartunullu utoqqanngortunut, aalisartunut piniartunullu inuutissarsiortillutik ajoqusertunut, aalisartutut piniartutullu inuutissarsiornermi maligassiuisuusimasut toqusut eqqaassutissaannut, immikkut pissutissaqartillugu aalisartut piniartullu, pingaartumik inuusuttut, aningaasaateqarfiup siulersuisuisa isumaat malillugu ikiorserneqarsinnaapput.

Nersornaaserneqartut najukkaminni aalisartut piniartullu peqatigiiffiinit kommunalbestyrelsillu innersuussinerisigut siunnersuutaapput.

AAMMA ATUARUK Aalisartut piniartullu nersornaaserneqarput

Nersornaatit decembarip ulluisa 21-anni ullukinnersiornermi, nalliuttorsiorpalaartumik najukkami kommunip allaffiani imaluunniit nunaqarfimmi aqutsisut allaffianni tunniunneqarput.

Carl Egedep Aningaasaateqarfiata siulersuisui tassaapput Aalisarnermut, Piniarnermut Nunalerinermullu Naalakkersuisoq, Jens Immanuelsen, KNAPK-llu siulittaasuata tullia Karl Tobiassen.

Nersornaaserneqartut tassaapput:

Nukarleq Lars Lindenhann, Sisimiut

Karl Jeremiassen, Aasiaat

Ulrik Inûsugtok`, Attu

Hans Henrik Broberg, Qeqertaq

Gustav Simigaq, Qaanaaq

Andreas Ingemann, Kuummiit

AAMMA ATUARUK Sermersuumi innuttaasut angalanissamut 716.000 koruuninik taperneqartut