Sermersuumi innuttaasut angalanissamut 716.000 koruuninik taperneqartut

Innuttaasut 114-it angalanermut aningaasaateqarfimmit taperneqarumallutik qinnuteqarsimapput. Qinnuteqaatit katillugit 1,6 millionit koruuninik naleqarput. Aningaasaateqarfilli 716.000 koruuninik imaqarmat kommuni pingaanersiuisariaqarsimavoq. 

Kommuneqarfik Sermersooq  nittartakkamini taama allaaserisaqarpoq. 

Angalanissamut tapiinissamut pingaarnersiuinermi ilaqutariit isertitakinnerusut ukiunilu tallimani kingullerni angalanissamut periarfissaqarsimanngitsut isiginiarneqarsimapput. Taama amerlatigisunik tapiissuteqartoqarsinnaasimanera angalanissamut aningaasateqarfimmi siulittaasup Rasmine Geislerip nuannaarutigaa. 

- Aningaasaateqarfiup tunngavia siunertaalu naapertorlugu qinnuteqartut akornanni 54-it aningaasaliiffigaagut isumaqaratta taakkorpiaat aningalanissaat pingaaruteqartuusoq iluaqutaasussaasorlu. Nuannaarutigeqaarput innuttaasut 54-it taakkulu ilaqutaat ukioq manna tapiiffigisinnaagatsigit aamma nuannaarutigalutigu aningaasat tapiissutaasussat taama amerlatigisut aningaasaateqarfiup siulersuisuinit agguaassinnaagatsigit, Rasmine Geisler oqarpoq. 

Ilaqutariit imminnut ungasissumiittut ataqatigiinnerisa attatiinnarneqarnissaat siunertaralugu angalanermut aningaasaateqarfik tapiisarpoq. Taamatullu nunat allat aamma kulturit allaanerusut takuneqarnissaat siunertarineqarluni kommunini innuttaasut Kalaallit Nunaata iluani avataanilu anglanissaat periarfissinneqartarlutik.