Inuit Afrika sikumiittoq pillugu isummertut: Neriuppunga Pape nunatsinnut tikeqqissanngitsoq
Folketingemi oqallinnerup sisamanngormat ammarneqarnerani tamanna aallartippoq. Aaja Chemnitzip (IA) Søren Pape Konservatiivineersoq aperaa, ilumut Papep oqaatiginikuuneraa “Kalaallit Nunaat Afrika sikuusoq.
Tamanna Søren Papep ullup aappassaani aatsaat eqqaasinnaasimavaa – tassani oqaatsini sakkortuut utoqqatsissutigai, isummannili allanngortinngilaa “Pissutigalugu Kalaallit Nunaat pissutsit ilaatigut nunanut inerisarniakkanut sanilliunneqarsinnaammat”, statsministerinngornissamut qineqqusaartoq Ekstra Bladetimut oqarpoq.
Pape oqaaserisaminut sapaatip akunnerata naanerani utoqqatsereeraluartoq, KNR-ip inuit naapitaasa taanna iluarinngilaat.
Hansine Broberg Geisler:
Søren Pape Poulsenip nunarput Afrika sikumiittutut taasimagaa qanoq isumaqarfigaajuk?
- Kusanaaqaaq oqaasia, nunarput tilleriaraluaramikku pisinnaannginnamikku kamattorsuit, oqaasia kusananngilaq, neriuppunga nunatsinnut tikeqqissanngitsoq quianaaqaaq.
Pape ilaatigut oqarpoq nunatsinni meeqqat qanigisamit atoqatigineqartartut ukiut tamaasa amerlangaatsiartartut, angerlarsimaffippassuarnilu akissarsiat imigassamut atorneqartartut imminullu toquttorpassuusartut innersuussutigai. Tamanna qanoq isumaqarfigaajuk?
- Uanga isumaqarpunga nalinginnarsuaruna oqaluttoq eqqunngillat amerlanerni taamaattoqanngilaq, kalaalerpassuit massakkut ataatsimoorrattarput eqqissillutik imigassartaqanngitsumik nalunngilara. Massakkut qaaqqusaagaangatta imertoqarneq ajorpoq salluliortorsuaruna nunarput takussanngilaa kingorna tikikkaluarpat ajattariartussavara timmisartoqarfimmut, Haha
AAMMA ATUARUK Ministeriunertut qinigassanngortittup nunarput Afrikatut sikumiittutut taasimallugu uppernarsaraa
Pape Statsministerinngussappat illit qanoq igissaviuk?
- Uuff neriuppunga isissanngitsoq ataatsimilluunniit, neriuppunga qinerneqassanngitsoq taama iluanngitsigisorsuaq Mette Frederiksen ajussanngilaq pitsaasorujuuvoq kalaallinut, Hansine Broberg Geisler KNR-imut oqarpoq.
Marie M. Johansen:
Søren Pape Poulsenip nunarput Afrika sikumiittutut taasimagaa qanoq isumaqarfigaajuk?
- Soorunami taassuma oqariartuutaa eqqarsaatigilluassagaanni ilisimaarisaqanngitsutut nalilerpara Kalaallit Nunaannut ilisimaarisaqarpianngilaq.
Soorlu kalaaleq aamma ilisimaarisaqarnani Danmarkiliaraluaruni aamma taamak qisuariaateqarsinnaavoq. Ataqqinninngilaq.
Pape ilaatigut oqarpoq nunatsinni meeqqat qanigisamit atoqatigineqartartut ukiut tamaasa amerlangaatsiartartut, angerlarsimaffippassuarnilu akissarsiat imigassamut atorneqartartartut imminullu toquttorpassuusartut innersuussutigai. Tamanna qanoq isumaqarfigaajuk?
- Oqaatigisimasai eqqarsaatigissagaanni taanna meeqqanik atornerluineq tappiffiginerusariaqarparput, taavalu imigassamik atuineq qanoruna iliorniaripput millisinniarlugu, ilaqutariinnut inuuneq qaammarsarniarlugu qanoruna taava iliorniartugut.
Utaqqiinnarata naalakkersuisunut, uagut innuttaasutut qanoq iliuuseqarnissarput aamma pingaaruteqarpoq. Ineriartornermut aamma malinnaanerunissaq nunatsinnut tunngasut pisariaqarput.
Pape Statsministerinngussappat illit qanoq igissaviuk?
- Statsministerinngussaguni Kalaallit Nunaannut ilisimasaqarnerulertariaqarpoq, paasinerusariaqarpaa nunarput qanoq ittuunersoq. Ilisimaarinerusariaqarpaa uagummi qallunaatut innuttaassuseqarpugut paasinerusariaqarpaa qanoq ittuunersugut.
Agnette Phipps:
Søren Pape Poulsenip nunarput Afrika sikumiittutut taasimagaa qanoq isumaqarfigaajuk?
- Kalaallit Nunaat ammut isigalugu naqissuserlugu Afrikamullu sanilliullugu tulluanngilaq.
Pape ilaatigut oqarpoq nunatsinni meeqqat qanigisaminit atoqatigineqartartut ukiut tamaasa amerlangaatsiartartut, angerlarsimaffippassuarnilu akissarsiat imigassamut atorneqartartut imminullu toquttorpassuusartut innersuussutigai. Tamanna qanoq isumaqarfigaajuk?
- Tulluanngilaq kalaallit aamma amerlapput paarsilluartut, nammineq isumaginninnermi ikiortitut isummissaguma eqqumaffigineqalernikuupput atornerlugaasut atornerluisut ikiorneqarnissaannik. Tulluanngilaq kalaallit taamatut taaneqarneri. Oqaasii sakkortulaarput.
Pape Statsministerinngussappat illit qanoq igissaviuk?
- Naa qinissanngilarsi. Hahaha
Sammisaq naatsumik pillugu
- Folketingemi oqallinneq sisamanngormat ammarneqarnerani tamanna aallartippoq. Aaja Chemnitz (IA) Søren Pape Konservatiivineersoq aperaa, ilumut Papep oqaatiginikuuneraa “Kalaallit Nunaat Afrika sikuusoq.
- Søren Pape statsministerinngorniarluni Konservativenit qineqqusaarpoq.
- Søren Pape taamak oqarnikuunerminik eqqaamasaqanngikkiarluni tallimanngormat eqqaamaleriasaarpaa.
- Ekstra Bladetimut oqaatigisimasani ajuusaarutigai, taamaakkaluartorli isummani allanngortinngilaa, "Pissutigalugu pissutsit ilaatigut Kalaallit Nunaat nunanut inerisarniakkanut sanilliunneqarsinnaammat"
- Tamanna Aaja Chemnitz KNR-imut oqaatigaa: - Suleqatigiissagaanni tamanna ataqqinninnginneruvoq, kalaallit Nunaat assuaralugu taamaannerarlugulu oqaaseqartoqarnera.
- Aaja Chemnitz partiimi siulittaasuminnit taperserneqarpoq Múte B. Egede. Taanna KNR ima oqarpoq:
- - Oqaaseqartup ( Søren Pape Poulsenip) taamatullu oqariartuuteqartup, inunnik nunatsinnullu isiginneriaasia, nammineerluni ersersinnaaraa, aammalu isumaqarpunga ataqqinninnginnermik, nunatsinnut, nunatsinnilu innuttaasunut ersersitsisoq, taamatullu inuiannut allanut, nammineq.