Múte B. Egede Søren Pape pillugu: Kalaallit Nunaannut ataqqinninngilaq

Konservatiivit folketingemut qinigassanngortitaat Søren Pape Poulsen Danmarkimi ministeriuninngorpat Naalakkersuisunik suleqateqarsinnaanera ajornukusoortorujussuussaaq.

Taama oqarpoq Naalakkersuisut siulittaasuat Múte B. Egede, Søren Pape Poulsenip Kalaallit nunaat nunanut ineriartortinneqartunut assersuussinerata kingorna. 

- Oqaaseqartup ( Søren Pape Poulsen-ip) taamatullu oqariartuuteqartup, inunnik nunatsinnullu isiginneriaasia, nammineerluni ersersinnaaraa, aammalu isumaqarpunga ataqqinninnginnermik, nunatsinnut, nunatsinnilu innuttaasunut ersersitsisoq, taamatullu inuiannut allanut, nammineq

pitsaanertut inissillunilusooq taamatut oqariartuuteqarmat.

Naalakkersuisut siulittaasuat Múte B. Egede taama oqarpoq

Asssersuussineq akuerineqarsinnaanngitsoq 

Folketingemi ammaanersiorluni oqallittoqarnerani Aaja Chemnitzip tusarfinnit assigiinngitsunit imminnut attuumassuteqanngitsunit oqaluttuuneqarsimalluni Søren Pape aperivaa taama oqarsimanera ilumoornersoq.

- Inuiattut oqallisigivagut unammilligassagut, aaqqiivigineqarnissaat suliarivagut.  

Taama oqarsimanera ilumoornersoq Søren Papep uppernarsaqqaarniaraluarpaa, kingornatigulli aviisimi Ekstra Bladetimut apersorneqarluni oqarpoq, Kalaallit Nunaat nunanut allanut ineriartortinneqartunut assersuunneqarsinnaasoq.

Tamannalu akuerineqarsinnaanngilluinnartoq Múte B. Egede oqarpoq 

Oqariartuutigerusutara tassaavoq, ministeriunertut imminut neqeroorutigaluni qineqqusaarnerani, taamatut inississagaluarpat, inerititaqarfiusumik pitsaasumillu suleqatigiittoqarsinnaanera killissaqartorujussuartut isigigakku oqaatigissavara, Naalakkersuisut siulittaasuat taama oqarpoq  

Unammilligassat oqaluuserivagut 

Aviisimi Ekstra Bladetimi Søren Pape ilaatigut ima oqarpoq:

 Meeqqat kinguaassiuutitigut atornerlunneqartut ukiut tamaasa amerlasoorujussuit tusarliunneqartarput tamakkualu ajortorujussuupput. Maani Danmarkimi aamma Kalaallit Nunaannut tikeraaraanni, Pape taama oqarpoq, tamakkualu oqaluuserinngikkaani iluaqutaanngilaq, Søren Pape Poulsen aviisimut  ekstra bladetimut taama oqarpoq.

Taama oqarnera imminut ajunnginnerusutut inissisimasutut saqqummiinerusoq Múte B. Egede oqarpoq.

.

AAMMA ATUARUK Aaja Chemnitz Papep Kalaallit Nunaat pillugu oqarsimaneranut: Ministeriuninngussappat ajornakusoortorujussuanngussaaq

Naalakkersuisut siulittaasuata oqarnera naapertorlugu isertuuneqarsinnaanngilaq Kalaallit Nunaanni inuttut atukkanik ajornartorsiortoqarmat, tamakkualu oqaluuserineqarttut.  

- Inuiattut oqallisigivagut unammilligassagut, aaqqiivigineqarnissaat suliarivagut, aamma inuiannik allanik. Taakkua pillugit oqallinnissarput aamma suleqateqarsinnaanerput taanna ajortuunngilaq, taamaattorli inuiattut uagutsinnut isiginneriaaseq, pitsaanerullunilusooq imminut inissilluni, inuiaat kalaallit piinnarnagit, inuiassuit nunarsuup imikkoortuini Afrikami najugallit, taakkunannga pitsaanerusutut inissillunilusooq apeqqutinik taamaattunik suliaqarniarneq isumaqarpunga inerititaqarsinnaanngitsoq,

Mute B Egede taama oqarpoq imalu nangilluni. –

-Suleqatigiinnermik pitsaasumik inerisitsiniaraanni, ataqqeqatigiinneq   tassaavoq aqqutissat pitssanerpaartaat aammalu naligiittut, allanullu pitsaanerusutut imminut inissigani inissisimanissaq, Múte B. Egede taama oqarpoq.

Danmarkimi ministeriunissatut piukkullutik sassartut pingasut Danmarkimi TV-ikkut toqqaannartumik oqallittoqarnerani kukkussutigisimasaminnik nassueruteqarlutik aalllartipput. Konservatiivit siulitaasuat Søren Pape Poulsen periarfissaq atorluarlugu Kalaallit Nunaannut kalaallinullu utoqqatserpoq, taama toqqaannartigisumik oqarsimanini pillugu.- Taamaaliorsimasussaanngikkaluarpunga, Søren Pape Poulsen TV-ikkut oqallittoqarnerani taama oqarpoq.