Aaja Chemnitz Papep Kalaallit Nunaat pillugu oqarsimaneranut: Ministeriuninngussappat ajornakusoortorujussuanngussaaq

Konservatiivit sinnerlugit Folketingemut qinigassanngortittoq Søren Pape Poulsen sikumut quasattorujussuarmut pisimasutut assersuunneqarsinnaavoq.

Folketingi ammaanersiorlugu oqallittoqarnerani Inuit Ataqatigiit Folketingemut ilaasortaatitaata Aaja Chemnitzip Søren Pape aperivaa, ilumoornersoq Kalaallit Nunaat Afrika sikumiittutut taasimaneraa

Tamannalu tusarfinnit imminnut attuumassuteqanngitsunit oqaluttuunneqarsimalluni Aaja Chemnitz oqarpoq.

Søren Pape taama oqarsimaneragaanini siullermik uppersartinniaraluarpaa, tamannali maanna allanngorpoq.

- Pissutsinut assigiinngitsunut Kalaallit Nunaat nunanut ineriartorfiusunut assersuunneqarsinnaalluartoq isumaqarpunga, Søren Pape aviisimut Ekstra Bladet-imut tallimanngornermi taama oqarpoq.

Ministeriuninngortussatut qinigassanngortittup Kalaallit Nunaat pillugu taama oqarnera ernumanartoq, Aaja Chemnitz knr-imut taama oqarpoq.

- Suleqatigiissagaanni tamanna ataqqinninnginneruvoq, kalaallit Nunaat assuaralugu taamaannerarlugulu oqaaseqartoqarnera.

Kalaallit Nunaannimi ajunngitsorpassuarnik ingerlasoqarpoq kivinneqartarlutillu, nunanimi allani ineriartorfiusuni inuuniarneq allaanerujussuuvoq, Aaja Chemnitz oqarpoq.

Aaja Chemnitz KNR-imut oqaluttuarpoq, taama oqarsimanini pillugu SMS-ikkut Aajamut utoqqatsersimasoq, qinersinerullu kingorna naapissallutik silaannaq salinniarlugu.

Taamaakkaluartoq Søren Papep ministeriuninngornissaa ajornakusuussasoq, Aaja Chemnitz

Søren Pape taama oqarsimanera ukiut arlallit matuma siorna amerikamiut danmarkimi aallartitaqarfiani pisimavoq. Aaja Chemnitzip oqarnera naapertorlugu pineqartup nassuiarneqarnissaa suli soqutiginarpoq.

- Kalaallit Nunaannimi pissutsinut isummat ammasumik oqaluuserineqarnissaat pingaaruteqartoq isumaqarpunga Aaja Chemnitz oqarpoq aamma taamaanneraasut nikaginnippalaartullu isornartorsiorlugit Aaja Chemnitz oqarpoq.

- Pissusissamisuussaaq Mette Frederiksen ministeriunertut toqqarukku, kisianni isumaqarpunga isumaqatiginniarnermi pitsaanerusumik atukkat qulakkeerneqarnissaat pingaaruteqartuusoq.

- Taamaattumik pingaaruteqartoq qinigaaffik kikkunnut atuutissanersoq siusissumik tunniutiinnannginnissaa, kisianni tigussaasunik erseqqissunillu piumasaqaateqarnissaq pingaaruteqarpoq, tamannalu ulluni tulliuttuni IA-mit saqqummiutissavagut, Aaja Chemnitz taama oqarpoq