Timmisartut taamaatiinnarneqartut: Inuit 2400-t aallarneq ajuleqqasut
Aasaanerani silap ajornera Air Greenlandimut ilaasussaanullu ajornartorsiortitsivoq. Ataasinngormamit maannamut timmisartut taamaatiinnarneqartut katillugit 99-iupput.
Air Greenland Facebookimi quppernermini allappoq.
Pujornera erseqqarlunnginneralu pissutigalugit timmisartumut ilaasussat 2400-it angalanerminni ingerlaqqinnissaminnut utaqqiinnarnerannik kinguneqarpoq.
Nunatta iluani timmisartuussinerit aammali Canadami Iqalunnut Iqalunniillu aamma Danmarkimut Danmarkimiillu timmisartuussinerit taamaatitsiinnarnermik eqqugaapput.
Nunatta kujataani angallassiniarneq sikorsuaqarnerani nuissallu appasissut putserneralu pissutigalugit amerlasuut aallarneq ajuleqqasut Air Greenlandip siusinnerusukkut allaaseraa.
Ikkussortarujussuartut suliassaasoq
Air Greenland aaqqiissuteqarniarluni suliaqangaatsiarlutik paasissutissiivoq.
- Suliassaq ikkussortakkatut immikkuualuttunik 2.000-nik katiteriffissaasutut, nunami ussissumi pujortumiittutut eqqaanarsinnaavoq.
- Pisut taamatsillugit ikkussortakkat inissitsiterujoorpagut pilersaarusiornermilu eqqaamasassaararpassuaqarpoq, Air Greenland allappoq.
Timmisartumi sulisunut, unnuinissamut periarfissamut silassamullu ilaatigut tunngapput.
Air Greenlandip naammanngitsunik paasissutissiiffigineqarsimasutut misigisimasoqarsinnaanera paasisinnaallugu allakkamini oqaatigaa.
- Soorunami sullitatta aallarnissamut piffissamik paasisaqarusuttarnerat paasisinnaavarput. Aamma paasisinnaaqaarput ilaqassappata misigisimasunik paasissutissanik naammanngitsunik tunineqarsimasutut. Pinerit tamaasa sullitagut malillugit tunniussiuaannarsinnaanngilagut, maanna pisut eqqarsaatigalugit.
Ilaasussat kingullit qaqugu aallarsinnaanissartik naatsorsuutigisinnaaneraat, Air Greenlandip paasissutissiissutiginngilaa.
