Inuiaqatigiit pillugit ilisimatooq: Folketingimut taasisut amerlanerusariaqarput

Inuiaqatigiinnut tunngasunut ilisimatooq, Birger Poppel isumaqarpoq, folketingimut taasiartortut amerlanerusariaqartut

Folketingimut qinersinissamut nunatsinnit taasisussat amerlanerusut angussagutsigu, politikkerit tusagassiorfiillu folketingimut qinersisarnerup sooq taama kalaallinut pingaaruteqartiginerata oqaluttuarinissaanut pikkorinnerusariaqarput.

Kalaallit nunaanni taasisartut procentianut appaseqisumut qaffassaataasinnaasut pillugit inuiaqatigiinut tunngasunut ilisimatusartoq Birger Poppel taama isumaqarpoq.

Taasiartortartut appasinnerata Folketingimi kalaallit nunaata soqutigisaanut kingunipiloqarsinnaasoq taanna isumaqarpoq.

Kingullermik 2011-mi folketingimut qinersisoqarpoq. Taasisinnaatitaasullu nunatsinneersut affai sinnilaaginnarlugit qinersipput. Ileqqorli taanna folketingimut qinersisoqartillugu takussaajuarsimavoq.

 

Taasiartortut amerlanerusariaqarput

Inuiaqatigiinnut tunngasunut ilisimatooq Ilisimatusarfimmiit soraarninngoqqammisoq, Birger Poppel isumaqarpoq taasiartortut amerlanerusariaqartut. Folketingimimi ilaasortaatitatta suliaannut innuttaasunit annertunerusumik tapersersorneqannginnerisa taassuma sanngiillisaataanerarpaa.

Birger Poppelilu isumaqarpoq politikkerit tusagassiorfiillu folketingimi sulianut qaammarsaanerunissaq akisussaaffiisa ilagigaat.

Innuttaasut folketingimut qinersineq pisariaqarpallaanngitsutut isigilersimavaat taanna isumaqarpoq - taakkulu marluk pitsaanerusumik ingerlatsinissamut sukataaleqqullugit kajumissaarlugit.

- Taasiartortut procentiat qaffassappat, pingaaruteqarpoq folketingimut qinersinissap tungaanut piffissaq paasititsiniarnermut atorneqassasoq, kalaallit nunaanni innuttaasunut sunaana pingaaruteqartoq folketingimilu ilaasortaatitaqarnerup pingaaruteqassusaa, Birger Poppel oqarpoq.

 

Ilaasortaatitat pisariaqartut

Taanna isumaqarpoq, folketingimi politikkikkut suliat namminiilivinnissamut suliap malunnarunnaarsittaraa. Tamassumap kingunerisarpaa, Folketingimi nunatsinnit ilaasortaatitaasut sulerisarnerat suliaasalu kalaallinut ataasiakkaanut qanoq pingaaruteqassusaat innuttaasunit tamakkiisumik ilisimaneqalerneq ajormata.

Tamanna imminut assortuuppoq, Kalaallit Nunaannummi pingaaruteqartunik milliard koruunit marluk affaannik aningaasartaqartunik folketingimi aalajangersarneqartarput, soorlu eqqartuussiveqarnermut tunngasut, nunanut allanut politikki aammalu danmarkimi kalaallinut tunngasunut suliniutit tassani aalajangersaaffigineqartartut, Birger Poppel oqarpoq.

Folketingimilu oqaluttarfik namminiilivinnissamut kissaateqarnermut pingaaruteqanngitsuunngilaq, taanna oqarpoq.

- Folketingimi oqaluttarfik oqaluttarfiit ilaanniittoq tassaavoq kalallit nunaannit isummanik saqqummiussiffik, aamma soorlu siunissami nuna namminiilivinnittussaanitsinnut kissaateqarnermik saqqummiussiffissaq, Birger Poppel oqarpoq.

 

Qinigassat

Maannakkumut Siumut, Inuit Ataqatigiit, Atassut Demokraatillu folketingimut katillugit 14-nik qinigassanngortitaqarput.

Partii Naleqqamiillu qinigassanngortinneqartut tallimanngorpat saqqummiunneqassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat