Inuiaqatigiit aningaasaqarnerat patajaallisarneqassaaq

Aningaasaqarnikkut pitsanngoriartornerup attatiinnarneqarnissaanut periusissat ilagaat Nunatsinni suliffeqarfinnik nutaanik pilersitsiortornissaq. Inuussutissarsiutit nalinginnaasut iluaniunngitsoq, inuussutissarsiutilli nutaat iluini. Naalakkersuisunut siulittaasup inuussutissarsiutit suliniutinut angisuunut inatsimmut ilaatinneqartut matuma pineruai.

-Inuussutissarsiutit nutaat iluatsitsiffigissagutsigit sulisussanik pisariaqartinneqartunik nammineerluta tunniussaqarnissarput pisariaqarpoq. Tamannalu ilinniartitaanikkut piumasaqaatitaqarpoq, meeqqat atuarfiannit qummullu. Qinigaaffimmi aggersumi pingaarnertut samminiagassatta ilagiumaarpaat. Assersuutigalugu piiaaveqarnerup iluani piginnaasanik piumaneqartunik innuttaasut pigisaqalernissaat qulakkeertariaqarparput, Kuupik Kleist oqarpoq.

Kuupik Kleistittaaq ukiut sisamat kingulliit ingerlanerini suliat ingerlateqqinneqarnissaat kissaatigisupilussuuaa. Inuit atorfinni qitiusuniittut taakkuuginnarnissaat matumani pingaartinneqarpoq, taamaaliornikkut ingerlajuaannartoqarnissaa inuiaqatigiinni pisariaqartinneqartoq tunniukkumallugu. Kleistip siunissami taamatut ingerlasoqaannarnissaa kissaatigaa. Naalakkersuinulli ilaasortat maanna issiasut atorfeqaannarnissaannik qulakkeerinnikkusunngilaq.

-Arlaannilluunniit qulakkeersimasoqanngilaq. Pitsassuarnik qinigassanngortitaqarpugut, Inatsisartunullu qinigaanissaq tamaviaarnartupilussooreerluni. Aamma partiitsinni taaguunneqarnerpaaqqinnissara qulakkeersimanngilaq. Qinersisartut qanoq aalajangernissaat utaqqimaassavarput, naalakkersuisooqataaqqinnissatsinnulli naammattunik taagunneqaqqissagutta ilaasortaasut akornanni kiinnanik ilisarnartunik takusassaqarnissaa ilimagineqarsinnaavoq, Kuupik Kleist knr.gl-imut oqarpoq.

Aalisarnerup, piniarnerup nunalerinerullu iluani aamma tamaviaarussamik suliniartoqassaaq. Nunalerinerup iluani ineriartortitsineq ingerlatiinnarneqassaaq, aamma aalisarnerup iluani iluarsartuusseqqinnerit ingerlanneqartut qinigaaffimmilu qaangiuttumi aallartisarneqartut naammassineqarnissaat pisariaqarluinnarpoq.

-Aalisarneq inuussutissarsiutitut akilersinnaasutut ingerlatiinnarsinnaassagutsigu tamakkiisumik iluarsartuusseqqittariaqarpugut. Toqqammavileereerpugut, sinerissalli qanittuani avataanilu aalisarneq iluanaarutaasunngortikkumallugu ingerlaqqissaagut. Aalisartut ingerlatseqatigiiffiillu pisanik suliaqartuusut tapiissutinik pisartagaqartuuiinnaratik nunatta karsianut tunissuteqartalersissavagut, Kuupik Kleist isumaqarpoq.