Kinguaassiuutitigut atornerluineq oqallisigineqaqqilertoq: Pipaluup ukiut qulit matuma siorna piviusulersaarusiani agguaappaa
Filminik ilitsersuisoq Pipaluk K. Jørgensen Eqaluk Høeghip nunatsinni inuuniarnikkut ajornartorsiuterujussuit akiornissaannut iliuuseqaqqusineranut qisuariartunut ilaavoq.
Oqallinnermi sakkortusiartortumi Eqaluk Høegh videoliami Facebookkikkut saqqummiunneqartumi Naalakkersuisut siulittaasuata allattaatut soraarniuteqarpoq.
Inuppassuillu videoliamullu inuit internettikkut attaveqaqatigiiffiisigut qisuariarput.
- DR-ip piviusulersaarutaa "Byen hvor børn forsvinder" Tasiilamut tunngassuteqarpoq.
- Tasiilami meeqqat pingasuugaangata ataatsip kinguaassiutitigut atornerlugaasimasarnera meeqqallu marluugaangata ataatsip kommunip isumaginnittoqarfianut suliassanngortinneqarsimanera piviusulersaarummi saqqummiunneqarpoq.
- Piviusulersaarutip kingunerisaanik Tasiilami nunattalu sinnerani isumaginninnikkut ajornartorsiutit kingumut oqallissaaqqilerput.
- Illuatungiliuttut partiillu tapertaasut Demokraatit aalajangiiffigisassatut siunnersuummik pingasunngormat saqqummiussipput: Naalakkersuisut isumaginninnikkut ikiorneqarnerunissamik Danmarkimut noqqaassuteqarnissaart piumasaqaatigaat. - Taamatut piumasaqaateqartoqarnera Naalakkersuisut mtaasinngornermi maajip 27-ani akueraat.
AAMMA ATUARUK Kim Kielsenip allattaa appisaluussivoq: Facebookikkut soraarniuteqartoq
Internettikkuinnaanngitsorli qisuariartoqarpoq. Pipaluk K. Jørgensenimi kinguaassiuutitigut atornerluineq pillugu piviusulersaarusiaminik DVD-nngortissimasanik amerlasuunik Nuup qeqqani saneqquttunut agguaavoq.
Kinguaassiuutitigulli atornerluinerup ajornartorsiutaanera siullermeerluni ersersinniarsarinngilaa. Piviusulersaarummi ukiut qulit matuma siorna saqqummersinneqarpoq.
- Ikiortissarsiorfissaqanngitsoq taamani oqaatigisaqattaarpara. Eqqartueqatigiittariaqarluta taamatullu ikiorneqarluta, Pipaluk K. Jørgensen oqarpoq.
AAMMA ATUARUK Nunatsinni tamani ajornartorsiortoqarmat suliassaqaqaagut
Piviusulersaarut nunatsinni illoqarfinni qulini takutinneqarmat, amerlangaatsiartunit takuneqarpoq. Ukiullu qulit matuma siorna filmiliami pineqartup suli ullumi ajornartorsiutaasorujussuunera filminik ilitsersuisup pakatsissutigaa.
- Ilumoorsinnanngilaq ukiut qulit ingerlareersut, suli ajornartorsiutip piunera. Taamaammat maaniippunga, Pipaluk K. Jørgensen oqarpoq.