Ane Hansen: Inoqarfiit aalajangiisussaaqataassapput
- Ilusiliarput pisariittunnguuvoq innuttaasunullu qanilaartuulluni, Kommune Qeqertallip borgmesterissaa, Ane Hansen, oqarpoq.
Qaasuitsup Kommunia, ukiortaami atorunnaartussaq, innutaasunit isornartorsiorneqartarpoq, ajornartorsiutaanerarlugu, sumiiffinnit assigiinngitsunit saaffiginnissutit qitiusumi allaffeqarfimmi Ilulissaniittumi taamaallaat suliarineqarsinnaasartut.
Aamma qitiusumit aqutsineq patsisigalugu namminneq illoqarfitsik unittoorsimasoq, Qaasuitsup Kommuniata avinneqarnissaa sioqqullugu isornartorsiuisut KNR-imut oqartarput.
AAMMA ATUARUK Sumiiffinni oqartussaaneq aallukkaat
Isornartorsiutillu tamakkua Qeqertalimmi siuttut eqqarsaatimminniitissimavaat.
- Qulakkeerniartarusupparput nunaqarfinni illoqarfinnilu susaavittoqartannginnissaa. Tassa ingerlajuaannaavittariaqarput minnerpaaffeqarlutik. Kisianni aamma sanaartugassanik annertuunik killikkaangatta isumaqatigiinniarnerit aamma annertusisassapput.
Sumiiffinnilumi kissaaterpassuit tamaasa ataatsikkut piviusunngortissinnaanngilaat, pingaarnersiuinissarlu pisariaqassaaq.
AAMMA ATUARUK Sulisorineqartussat inissaqartinneqassapput
- Kissaaterpassuaqartuaannarnissaat naatsorsuutigivarput aamma taamaattariaqarpoq. Kisianni ikioqatigiinnitsigut tulleriiaarisassuugut suut pisariaqartinneqavinnersut suullu akissaqartinneqarnersut, Ane Hansen oqarpoq.
Assersuutigalugu:
- Meeqqeriveqanngitsut qiviaraanni, nunaqarfitsinni inuttunerpaaq, 300-t tungaanut innuttaasulik meerarpassuaqarfiusorlu, tassa Niaqornaarsuk, meeqqeriveqanngilaq. Qularnanngilluinnaqqissaartumik taanna siulliutassarivarput meeqqeriviliorfigalugulu.
Niaqornaarsummi 2019 nallertinnagu meeqqeriviliorniarlutik, Ane Hansen oqarpoq.
Kommune Qeqertallip 2018-imut missingersuutaa 550 millionit koruunik aningaasartalik ikaarsaariarnermi atatsimiititaliap novembarip 27-ani akuerereersimassavaa.