Innuttaasut tusindilikkuutaat aningaasanik pissarsipput. Taakkunannga ilaavit?

Suila-tapit tassaavoq sulisartunut annikinnermik naammaannartumilluunniit isertitalinnut aningaasatigut tapiissut nutaaq. Suila-tapit akileraarutinik aaqqissuusseqqinnerup 2025-p aallartinnerani atuutsilersinneqartup ilagaa.

Ukiumut 70.000-t aamma 500.000-t akornanni isertitaqaruit tapiissuteqarfigineqarsinnaavutit. Aningaasarsiat apeqqutaallutik tapiissut annertussusilerneqartassaaq.

Kontomi kisitsisit qorsuit

Inunnut 21.298-inut katillugit 17,4 millionit koruunit agguarneqarput. Aningaasat tunniunneqartut assigiinngiiaarput, amerlanerilli 101 koruunit 1.313 koruunillu akornanni tapiiffigineqarput.

Ukiumut 160.000-250.000 koruunit akornanni isertitaqaruit qaammammut annerpaamik 1.313 koruuninik taperneqartassaatit.

Ukiumut 70.000-160.000 koruunit akornanni imaluunniit 250.000-500.000 koruunit akornanni isertitaqaruit annikinnerulaartumik taperneqassaatit.

Aningaasat qaammammi marlunngornerit pingajuanni tunniunneqartassapput. Akileraartarnermut Aqutsisoqarfik qaammatit marluk kingulliit isertitatit aallaavigalugit naatsorsuivoq. 

Tapiissuteqarfigineqarniaruit NemKontoqartariaqarputit. Piginngikkukku aningaaseriviit attavigisinnaavat pilersikkumallugu.

Kisitsisit nalornissutigivigit? 

Suila-tapit pisimanngikkukkit kisitsisilluunniit eqqorsorinngikkukkit, Akileraartarnermut Aqutsisoqarfiup 2025-mi isertitannik naatsorsuinera Suila.gl-imi imaluunniit Sullissivik.gl-imi MitID atorlugu misissorsinnaavat.

Ukiumut 500.000-t sinnerlugit isertitaqaruit tapiissuteqarfigineqarsinnaanngilatit. Kisitsisit 475.000-500.000-t akornanniippat Akileraartarnermut Aqutsisoqarfiup kisitsisinik eqqortunik naatsorsuinissaata tungaanut aningaasat uninngatinneqarallassapput. Aningaasarsiannut atatillugu paasissutissat amigarsorigukkit sulisitsisunnut, pisisartunnut imaluunniit suliffeqarfimmut tunitsivigisartakkannut nalunaarsuineq ajunnginnersoq misissoqqusinnaavat.