Danskit politiivi Nuummut tikittut
Nalunaaqutaq 18.08 nutarterneqarpoq.
Kalaallit Nunaanni Politiit pigaartuisa pisortaata Preben Kleistip politiit nunatsinni politiinut ikiuukkiartorlutik tikittut uppernarsarpaa, allamilli oqaaseqarsinnaanani paasissutissiivoq.
KNR-ip paasissutissarsiai naapertorlugit politiit aamma Sisimiunukassapput.
Politiit USA-mit tikeraartoqarneranut atatillugu nunatsinniipput.
USA-p præsidentiata tullersortaata, J.D. Vancep nulia Usha Vance sapaatip akunnerata tulliani pisortatigoortuunngitsumik tikeraassaaq, taassuma Avannaata Qimussersuani Sisimiuni sapaatip akunnerata naanerani sukkaniunneq ilaatigut malinnaaffigissavaa.
Timmisartoq sapaammi ualikkut pingasut qeqqatangajalersoq mippoq, KNR-iillu ilanngutassiortup mittarfimmiittup timmisartumut ilaasut 60-it missaanniinnerarpai, taakkulu amerlanerpaartaat politiiupput, politiit qimmii pingasut timmisartumut aamma ilaapput.
Nalunaaqutaq arfernup qaangilaaraa, danskit politiivi 20-t Sisimiunut tikipput, taakku Usha Vancep tikeraarnerata nalaani kalaallinut politiinut ikiuissapput, Sermitsiaq ingerlaavartumik nutartertakkaminni allappoq.
