Innuttaasut toqqissisimassapput: Avannaata Kommuniani najukkami ataatsimiititaliaqalersoq

Avannaata Kommuniani innuttaasut illoqarfimmi siunissami pisuttuaraangamik toqqissisimanerulersinnaassapput.

Pinerluttarnerimmi pinaveersaartinniarlugit Avannaata Kommunia aamma Kalaallit Nunaanni Politiit suleqatigiillutik najukkami ataatsimiititaliamk pilersitsipput. Kalaallit Nunaanni Politiit tusagassiuutinut taama nalunaaruteqarput.

Avannata Kommunia tassaalerpoq nunatsinni kommunit pingajuattut najukkami atatsimiititaliaqalersoq.

- Kommuni politiillu suleqatigilluareerput. Najukkami ataatsimiititaliaqalernitsigut suleqatissaqarnerulerpugut, aaqqiissuteqarniarnermilu suleqatigiit amerlanerulermata pinerluttarnernik pinaveersaartitsineq pitsaanerulersinnaavoq, Kalaallit Nunaanni Politiini politikommissæri Palu Eriksen oqarpoq.

Toqqissisimatitsillutik suleqataasussat

Najukkami ataatsimiititaliartaaq Avannaani pinerluttarnernik pinaveersaartitsinermut pingaaruteqarluinnalersinnaasoq Kalaallit Nunaanni Politiineersoq Palu Eriksen oqarpoq.

Taamaattumik Ilulissani Uummannamilu kajumissutsiminnik suleqataarusuttut, namminersortutut inuussutissarsiuteqartut, peqatigiiffilerisut allallu soqutiginnittut naapisinneqarsimasut tusagassiuutinut nalunaarummi allaqqavoq. Pinerluttarnernerup qanoq ajornartorsiutaatiginera oqaluuserineqarpoq, taamatullu takorluukkat, siunertaq, ajornartoorsiutit suuneri aamma isumassarsiat naapinnermi oqallisigineqartut ilagaat.   

- Najukkami ataatsimiititaliartaaq tamatsinnut nutaajulluinnarpoq. Inernerinik takusaqartinnata aallartisarluta piareersarluaqqaassaagut. Ilulissani, Uummannami aamma Upernavimmi aallartissaagut, kingornalu Qaanami aallartissalluta, Avannaata Kommuniani borgmesteri Palle Jerimiassen oqarpoq.

Avannaata Kommuniani najukkami ataatsimiititaliartaap saniatigut Kommune Kujallermi Qeqqata Kommunianilu najukkami ataatsimiititaliaqarpoq. Nunatsinni kommunet tamarmik ukioq naatinnagu najukkami ataatsimiititaliaqalissasut Kalaallit Nunanni Politiit pilersaarutigaat.