Innuttaasut peqqissusaat pillugu nalunaarusiaq neriulluarnartoqartoq

Inuusuttut 18-it 29-nillu akornanni ukiullit pingajorarterutaat, imaluunniit 32,8 procentii, kinguaassiuutitigut kannguttaatsuliorfigineqarsimasut nalunaarusiap takutippaa. Kisitsisillu taakku 2005-imi kisitsisiutigineqartunut assingoqqissaarput.

Kisitsisit nikallornarsinnaagaluartut, neriulluarnartoqartoq, nalunaarusiamik suliarinneqataasup, ilisimatuup Christina Larsenip oqaatigaa.

- Unammillernartut tamaasa assigiisikkukkit, taava imigassamik aalakoornartortalimmik atuineq siornatigut annertoorujussuusimavoq. Tamannali 1990-ikkunniilli annikilliartorsimavoq.

- Taamaammat meeqqat 1990-ikkunni kingornatigullu inunngortut angerlarsimaffinni imigassamik aalakoornartutalimmik ajornartorsiorfiusuni peroriartortut ikinnerupput. Kinguaassiuutitigut kannguttaatsuliortoqarsimatillugu imigassamik aalakoornartutalimmik atuisoqarsimasoqarajuttoq aamma ilisimavarput.

- Taamaammat kinguaassiuutitigut kannguttaatsuliornerit pillugit kisitsisit ukiut qulit matuma siorna kisitsisinut nikingavallaanngikkaluartut neriulluarnartoqartoq uagut isumaqarpugut, ilisimatooq oqarpoq.

Aamma imminut toquttut imminullu toqunnissamik eqqarsaateqartarneq pillugit illoqarfinni anginerni neriulluarnartoqartoq, Christina Larsen isumaqarpoq.

- Imminut toqunnissamik eqqarsartarneq kinguaassiuutitigut kannguttaatsuliornermut angerlarsimaffimmilu imigassamik aalakoornartutalimmik ajornartorsiuteqartumi peroriartornermut attuumassuteqarajuttartoq nalunngilarput.

- Illoqarfinnili anginerusuni, soorlu Nuummi, ilinniarnissamut ineqarnissamullu periarfissat pitsaanerusut takusinnaavarput.

- Inuunermilu atugarisat ima pitsaanerulersimatigipput imminut toquttut ikiinnerulersimallutik. Taakkuuppullu uagutsinnut neriullualersitsisut, Christina Larsen oqarpoq.