Innuttaasut namminiilivinnissaq pillugu apeqqut avissaaqqaffigigaat

- Namminiilivinnissaq tamatumalu qanoq isumaqarfigineqarnera Kalaallit Nunaanni apeqqutitut assigiinngitsorpassuarnik katitikkatut ippoq, Københavnip Universitetiani aningaasaqarneq pillugu instituttimi ph. d.-nngorniartoq, ilisimatusartullu misissuinermik ingerlatsisut marluusut aappaat, Gustav Agneman, taama oqarpoq.

- Assigiinngitsunik apeqquteqaraangatta, soorlu qaqugu pissanersoq, ullumikkut namminiilivinnissaq akueralugu taaserusuttoqarnersoq, ukiulluunniit qulit qaangiuppata namminiilivinnissaq kissaatigineqarnersoq, taava namminiilivinnissap qaqugu qanorlu pinissaa pillugu akissutit assigiinngitsupilussuusarput, ilisimatusartoq oqarpoq.

Misissuineq naapertorlugu 38 procentit sinnilaarlugit namminiilivinnissamut akuersillutik ullumikkut taasissagaluarput, ukiullu qulit qaangiuppata 45 procentit sinnerlugit akuersissagaluarlutik. Ullumikkuusuuppalli 32 procentit naaggaarlutik taasissagaluarput, ukiullu qulit qaangiuppata 21 procentit naaggaarlutik.

Apeqqullu massakkoqqissaaq isummerfigineqassagaluarpat 10 procentingajaat taaseqataassanngikkaluartut, misissuinermi ersersinneqarpoq.

AAMMA ATUARUK Silap pissusiata allanngoriartornera innuttaasut ernumanartoqartikkaat

- Soqutiginartua tassaagunarpoq, namminiilivinnissaq pillugu apeqqummi taama pingaaruteqartigisumi innuttaasut tamakkerlugit peqataatikkusunneqarnerat. Paasivarpullu Tunumi innuttaasut arlallit akuersillutik naaggaartutilluunniit taaseqataanissartik kissaatiginngikkaat, taamaammat Tunumi taaseqataarusuttut ikinnerussapput, Gustav Agneman oqarpoq.

AAMMA ATUARUK Silap pissusia pillugu ataatsimeersuarnermi suliniutit nutaat aallartisarneqartut

Ilisimatusartut misissuisuusut, Gustav Agnemannip Kelton Ray Minorillu, ilisimatusaatigisamik inuiaqatigiinni oqallinnermi misissuinermilu sammineqartut pillugit politikkikkut aalajangiiniarnermi tunngavissatut atorneqarsinnaanissaat neriuutigaat.  

Namminiilivinnerup nunatta aningaasaqarneranut qanoq sunniuteqarnissaa aamma assigiinngitsunik isumaqarfigineqarpoq. Namminiilivinnissamik kissaateqartut aningaasaqarnermut iluaqutaassasoraat, namminiilivinnissamullu akuersaarpallaanngitsut namminiilivinnerup nunatta aningaasaqarneranut pitsaanngitsumik kinguneqarnissaa annilaangassutigalugu.

AAMMA ATUARUK Danmark Tuluit Nunaallu sila pillugu suliniuteqarnermi sallersaasut

Namminiilivinnissamut tunngatillugu aningaasaqarnikkut kingunerisassat pillugit innuttaasut isumaannik HS Analyse 2017-imi aamma misissuivoq.

Misissuinerup takutippaa innuttaasut amerlanerussuteqarluartut namminiilivinnissaq kissaatigigaat, aperineqartullu 23 procentii akipput nunatta aningaasaqarnera eqqugaassagaluarpalluunniit namminiilivinnissaq kissaatigalugu.