Innuttaasut LGBTQIA+-iusut atugarissaarnerat pillugu misissuineq nutaaq

Paasissutissanik amigaateqarnerup sivitsortumik akimmiffeqartitsivoq. Innuttaasut LGBTQIA+-iusut akornanni pitsaaliuinermik atugarissarnerannillu patajaallisaataasinnaasumik apeqqutit immersuilluni akisassat nutaat atorlugit ilisimasaqarnerulersitsissapput.

Allattoq Victoria Julie Schou

decembarip 05-at 2025 14:31

Nutserisoq Karla Heilmann

Nuna tamakkerlugu misissuineq nutaaq, innuttaasut LGBTQIA+-iusut nunatsinni peqqissusaannut atugarissaarnerannullu erseqqissaataasussaq nunatsinni siullermeersumik pissaaq.

Ilisimasaqarnerulernissamut, pitsaaliuinermik toraagaqarnerusumut innuttaasunullu taakkununnga, nunatsinni inuiaqatigiinni peqqissutsikkut nalunaarusiornermi qarsupiinnarneqangaatsiartartut, atugarissaarnerulersinneqarnissaannut alloriarneq pingaarutiliuvoq.

IPS – Inuit Pisinnaatitaaffii pillugit Kalaallit Nunaanni Siunnersuisoqatigiinnit, Sipineq+-imiit aamma Kalaallit Nunaanni Innuttaasut Peqqissusiannik Ilisimatusarfimmiit tusagassiuutinut nalunaarummi taama allaqqavoq.

Ilisimasakinneq

IPS-ip Sipineq+-illu nalunaarusiaanni “Kalaallit Nunaanni LGBTQIA+-iuneq” 2024-mi saqqummersinneqartumi, inuit LGBTQIA+iusut amerlasuut immikkoortinneqartarneq, nikagineqartarneq inuiaqatigiinnilu akuerineqarpiarneq ajorneq misigisaraat ersersinneqarpoq.

Nunat inoqqaavi aamma LGBTQIA+-itut kinaassusillit navianartorsiornerusartut nalunaarusiami aamma ersersinneqarpoq. Nuna tamakkerlugu nunanilu tamalaani misissuinerit naapertorlugit, tamanna tarnikkut ajornartorsiuteqalernernik, isumatsassimangaarnermik, annilaanganermik ajornerpaamillu imminut toqunnermik kinguneqarsinnaavoq.

Aamma atuarukInuttut Pisinnaatitaaffiit pillugit Siunnersuisoqatigiit: Inuit LGBT+-usut pillugit suli annertuumik assigiingisitsisoqartarpoq

Nalunaarusialli erneri eqqarsaatigalugit, nunatsinni inunnut LGBTQIA+iusunut misissuineq killeqartuarsinnarpoq.

Taamaattumillu inuit LGBTQIA+iusut nuna tamakkerlugu innuttaasunik misissuinerni ilanngunneqartassasut inassutigineqarpoq, tamannalu piviusunngortinneqalerpoq. Taamalu innuttaasut sinnerinut innuttaasullu LGBTQIA+-iusut nunatsinni inuiaqatigiinni peqqissutsikkut atugarissaarnerisigullu sanilliussinnaanngussammata.

Misissuineq isumaqartorujussuaq

Inernerit peqqissusaat atugarissaarnerallu pillugit siunissami suliniutinik tunngaviliissaaq.

Taakkununnga aningaasiissutaasut “nuannaarutaasorujussuupput”, ilimanaateqarluarporlu inunnut LGBTQIA+-iusunut ullumikkut siunissamilu iluaqutaasussamik allannguuteqaataajumaartoq erseqqissaatigaat.

NunaFonden-ip aamma Tips- og Lottofonden aningaasaliissutaanniit apeqqutit immersuilluni akisassat atorlugit misissuisoqarnissaa suliarineqassaaq.

Kalaallit Nunaanni inuit LGBTQIA+-iusut peqqissusaat atugarissaarnerallu pillugit nuna tamakkerlugu apeqqutit immersuilluni akisassat inunnut LGBTQIA+-iusunut Kalaallit Nunaanni najugaqartunut tamanut ammassapput, inuillu attaveqaqatigiittarfii aqqutigalugit siammarterneqassallutik.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.