Innuttaasut akisussaassuseqarnerunissaat ukkatarineqassasoq

- Demokraatininngaanniit annertunerpaamik anguniagaavoq, inuiaqatigiinni inuup sapinngisamik annertunerusumik kiffaanngissuseqarnissaanik tunniussinissaq, Randi Vestergaard Evaldsen oqarpoq.

Demokraatit tusagassiortunik pingasunngormat ullaakkut katersortitsipput. Partii talerperliuniartutut qineqqusaarniartoq partiip tassani oqaatigaa.

AAMMA ATUARUK Niels Thomsen qinigassanngortittoq

Innuttaasut inuunerminnut akisussaassuseqarsinnaanissaat tassani ilaasoq, Randi Vestergaard Evaldsenip oqaatigaa. 

Nunatta ukiuni 40-ni saamerliunerusuninngaanniit aqunneqarnera pissutigalugu inuit ilaat pisortanit akisussaaffigineqarnertik sungiussimagaat, partii isumaqarpoq. 

- Malunnartorujussuuvoq, partiinit saamerliunerusuninngaanniit taamannak aqunneqarluni inuit ataasiakkaat akisussaajaaffigineqartut, tamannalu pissusissamisoortutut isiginngilarput.

Ilaqutariit meerartallit ajornartorsiuteqartuusut Randi Vestergaard Evaldsenip assersuutitut taavaa.

AAMMA ATUARUK Siunnersuuteqarnissaq pisariaqanngitsoq

AAMMA ATUARUK Piitsuussutsimut killiliussaq partiinit taperserneqartoq

- Angajoqqaat meeqqanut akisussaaffitik tigussagaat, aamma taakkuummata nunatsinni siunissami aallussisussat. Taamaammat toqqissisimasumik meeraanissaat pisariaqartipparput, taamaammat angajoqqaat akisussaaffik tigusariaqarpaat, Demokraatit siulittaasuat, Randi Vestergaard Evaldsen oqarpoq.

Imminut akisussaassuseqarneq namminiilivinnermut, qineqqusaarnermi sammisaasorujussuusussaasorisaminut, aamma attuumassuteqarsoraa. 

Inuit ataasiakkaat imminnut akisussaassuseqarsinnaanngippata, nunatsinnut akisussaassuseqarnissaq ilungersunassasoq, Evaldsen isumaqarpoq.