Demokraatit: Siunnersuuteqarnissaq pisariaqanngitsoq

Demokraatit Inatsisartut ataatsimiinnissaannut siunnersuutinik aalajangiiffigisassanik saqqummiussaqanngillat. Paarlattuanik apeqquteqaat allaavigalugu oqallinnissamut siunnersuutinik arfineq-marlunnik nassiussipput.
Demokraternes logo Assi © : Demokraatit
marsip 05-at 2018 08:20

Inatsisartut ataatsimiinnissaannut siunnersuutinik aalajangiiffigisassanik saqqummiussinissaq imminut akilersinnaanngitsoq, Demokraatit siulittaasuat Randi Vestergaard Evaldsen isumaqarpoq:

- Naalakkersuisullu aalajangiiffissatut siunnersuutinik, upernaakkut ataatsimiinnissami akuerineqarumaartussanik, piviusunngortitsinissaat ilimananngilaq, Randi Vestergaard Evaldsen oqarpoq nangillunilu:

- Piffissaq atorneqartussaq sivikippallaarpoq. Uku siunnersuutigineqartut naammassinissaat ilimananngilaq.

AAMMA ATUARUK Kielsenip oqalugiaata politikkikkut assigiinngitsumik isummerfigineqartoq

Iluareqqusaarneq

Partiit naalakkersuisuutitaqartut Inatsisartut ataatsimiinnissaannut siunnersuutinik aalajangiiffigisassanik saqqummiussaqarput.

Kisianni iluareqqusaarniarnermik aallaaveqartumik, Randi Vestergaard Evaldsen isumaqarpoq. 

- Qularinngilara siunnersuutigineqarumaartussat amerlasuut isaasalerlugu iluareqqusaarutitut saqqummiunneqarumaartut. Qinersisartunut soorunalimi uku tusaaqqusaarutissaapput taamaammallu amerlasuutigut ilisimagaluarlugu ingerlatinneqaqqittussaanngitsut partiit allat saqqummiussiumaarput. 

Demokraatillu taama aalajangerput Inatsisartut siulittaasuat Lars-Emil Johansen Inatsisartunut mailikkut ima allagaqarmat:

- Ilaasortat siunnersuutaat eqqarsaatigalugit tamanna isumaqarpoq siunnersuutit akuerineqartut imaanngimmat pinngitsooratik qinersinerup kingorna ingerlateqqinneqassasut AIS2019 (Aningaasanut inatsisissatut siunnersuut 2019, aaq.) aqqutigaluguluunniit immikkoortinneqassasut, Lars-Emil Johansen allappoq.

AAMMA ATUARUK Atassut klar til at stille op til valg

Partiit sumi inissisimanerat paaserusukkaat

Saqqummiussaqannginnerallu tunngavissaqarluartoq, Demokraatit isumaqarput:

- Uagut isumaqarpugut ilisimareerlugulu amerlasuut ingerlaqqinnavianngitsut, piffissaataajaaginnartussatut oqaatigineqarsinnaavoq. Taamaammat Demokraatininngaanniit pingaartitagut qinersivissap tullissaani saqqummiukkusunneruagut qinersisartunullu ammasumik oqallissaarutiginiarlutigit. 

Apeqquteqaat allaavigalugu oqallinnissamut siunnersuutitik arfineq-marluusut politikkikkut siunissami suliaqarnermi atorsinnaassagitsik, Demokraatit neriuutigaat.

- Oqallissaarutitut siunnersuutigisatsinni neriuutigivarput partiit allat sumi inissisimanerat paasikannissallutigu, tassani ataatsimiinnissap tullianimut piareersalereerneq aallarteriissagatsigu, Demokraatit siulittaasuat Randi Vestergaard Evaldsen oqarpoq.

Inatsisartut upernaakkut ataatsimiinnerat tallimanngornermi apriilip ulluisa arfernanni aallartissaaq.