Kielsenip oqalugiaata politikkikkut assigiinngitsumik isummerfigineqartoq

Naalakkersuisut siulittaasuata, Kim Kielsenip ukiortaami oqalugiutaa pitsaalluinnartutut, Inatsisartuni Siumup politikkikkut oqaaseqartuanit, Jess Svanemit pitsaalluinnartutut nalilerneqarpoq.

- Oqartariaqarpunga ataatsimut isigalugu Naalakkersuisut siulittaasuata oqalugiaataa assorujussuaq pitsaasoq aamma imaqartoq aammalu soorunami tikkuussisoq nammineerluta qanoq iliuuseqartariaqarnissatsinnik.

AAMMA ATUARUK Mattussuinata inoqatitsinnik ilaserinninnerusa

Illuatungiliuttulli, tassa Demokraatit siulittaasuata oqalugiaat aallarluinnarmik nalilerpaa. Randi Vestergaard Evaldsenip siunissami suut pilersaarutaanersut oqalugiaammi amigaatigalugit oqarpoq.

- Ukua aalajangiinerit pereerput aamma aalajangerneqareerlutik. Suunaana taava tullinnguuttoq, qanoruna iliorluta Nunatsinni aningaasarsiulersinnaasugut? Qanoruna ililluta Nunatsinni unammilleqatigiissinnaasugut? Tamakku iluamik taakkartorneqanngillat, taakkulu amigaatiginarlutik.

Naalakkersuisooqataasunit, tassa Inuit Ataqatigiinnit oqalugiaat kusanartumik nalilerneqarpoq ilaatigut inuiaqatigiit ataqatigiinnissaanik Naalakkersuisut siulittaasuata oqariartuuteqarnera pitsaasutut isigineqarluni.

- Siullermik tassa isumaqarpugut, inuiaqatigiit ataqatigiittariaqarnitsinnik oqariartornera kissalaartumik tigusariaqaripput tamatta. Tassami inuiaqatigiittut ataqatigiinnissarput pisariqartipparput tamatta.

Inuit Ataqatigiit politikkikkut oqaaseqartartuat, Bendt B. Kristiansen taama oqarpoq. Oqalugiaalli pitsaanerusariaqaraluartoq, Bendt B. Kristiansen aamma oqarpoq.

- Isumaqarpugut naalakkersueriaatsimik pitsaasumik ingerlatsisimanermik naliliinera ullinnarsiorpallaartoq. Naalakkersuisut ataasiakkaat arlalitsigut taarseraanneqangaatsiarsimapput pingaartumik aalisarnermut naalakkersuisoqarfimmi. Nunanut allanut suleqateqarnermi periutsit atorneqarsimasut perorpiarsimanngillat Nunatsinni aamma aalassatsitsimik annertuumik, Bendt B. Kristiansen oqarpoq.

Illuatungiliuttut amigaataasa ilagaat, naalakkersuinikkut siumut isigaluni suut angorusunneqarnersut oqalugiaammi saqqummiunneqarnissaat.

- Tassa isumaqarpunga pisariaqaraluartoq, innuttaasunut takutissallugu Naalakkersuisut siulittaasuatut suna anguniagaanersoq aamma Naalakkersuisunit siunissamut suut sinnattorineqarnersut. Massakkut kingumut isigisorujussuuvugut, takorlooruminaalluni siunissamut suut angorusunneqarnersut. Tassa taanna uanga amigaatigisara.