Kielsen: Mattussuinata inoqatitsinnik ilaserinninnerusa
Immitsinnut nersualaarusunnerusuugutta uparuartuutiinnarata angusarneqarnerusinnaavugut. Naalakkersuisut siulittaasuat Kim Kielsen ukiortaami oqalugiarnerminut atatillugu taama ilaatigut oqarpoq.
Naalakkersuisut siulittaasuat innuttaasunut pisarneq naapertorlugu ukiortaami ippassaq ataasinngornermi oqalugiarami ilaatigut oqaatigaa immitsinnut nersualaarnerullutalu inoqatitsinnik mattussuinata ilaserinninnerusuugutta angusaqarnerusinnaasugut.
- Eqqarsaatigilaariarsiuk qanoq angusaqartigisinnaagaluartugut mattussuinata inoqatitsinnik ilaserinninnerusuugutta. Aammalu qanoq angusaqartigisinnaagaluartugut immitsinnut nersualaarnerusuugutta uparuartuutiinnarata, Kim Kielsen ilaatigut oqarpoq.
AAMMA ATUARUK Sumiorpaluutit pissutigalugit pimmatiginnittarpugut
Inuiaqatigiinni naligiinnerusumik angusaqarsinnaanermut tamanna aqqutissaasoq naalakkersuisut siulittaasuata oqaatigaa:
- Upperaara inuiaqatigiiulluta nammaqatigiinnitsigut, tapersersoqatigiinnitsigut ataatsimoorussinitsigullu naligiinnerusumik immitsinnullu naleqartinnerulluta angusaqarluarnerusinnaasugut.
Nunatta namminiilivittunngorniarnera, innaallagissap erngullu assigiimmik akeqalernissaat, nalunaarasuartaatit immap naqqatigut attavii, meeqqallu atugarisaat, naalakkersuisut siulittaasuata ukiortaami oqalugiarnermini aamma eqqartorpai.
