Inuit Ataqatigiit Innuttaasut akiitsullit ikiorusukkaat

Innuttaasut pisortanut akiitsui ikilisarneqassappata periarfissat assigiinngitsut atorneqartariaqarput.

Partii naalakkersuisoqatigiinniittoq Inuit Ataqatigiit Ilanngaassivik pillugu oqallinnermut taama ilaatigut oqarput. Akiitsunut akiliisitseriaaseq Ilanngaassivik piareersarluarniarlugu atuutilissanngikkallartoq, Naalakkersuisut siusinnerusukkut nalunaarutigaat.

AAMMA ATUARUK IIanngaassiviup atuutilersinneqarnissaa kinguartinneqarpoq

Innuttaasut pisortanut akiitsullit pitsaanerpaamik ikiorserniarlugit akiitsoqarneq pillugu siunnersuisarfimmik pilersitsisoqarnissaa pisariaqartoq Inuit Ataqatigiit isumaqarput, suliniutilli Ilanngaassivittut ittut kisimiitinneqassanngitsut isumaqarput.

- Siunnersuuteqarnitsinni siunertaq tassaavoq akiitsut annikillisarniarlugit immikkut ilisimasallit ikiortigalugit akiitsoqartunik akeqannngitsumik siunnersuisarnissaq, Inuit Ataqatigiit politikkikkut oqaaseqartartuat Bendt B. Kristiansen oqarpoq.

Islandimi akiitsullit Ombudsmandiatut ittumik Nunatsinni pilersitsisoqarnissaa Inuit Ataqatigiit takorloorpaat. Siunnersuisoqarfimmik inunnik akiitsoqartunik siunnersuisinnaasumik ikiuisinnaasumillu pilersitsisoqarnissaanut 2015-imi siunnersuutertik, Bendt B. Kristiansenip tikkuarpaa. Siunnersuut taamanikkut akuerineqarpoq, akiitsullu pillugit nalunaarusiap naammassineqarsimanera aallaavigalugu takuneqarsinnaavoq assersuutigalugu Kommune Kujallermi INI A/S suleqatigalugu ineqarnermut akiitsut pillugit misileraasoqarnissaa innersuussutigineqartoq.

Akiitsoqarneq pillugu suliniutit pillugit oqallinnissamut Inuit Ataqatigiit piareersimasut politikkikkut oqaaseqartartup oqaatigaa, Ilanngaassivittulli ittut kisimiitinneqassanngitsut aamma oqaatigalugu:

- Suliniut pisariaqassaaq, kisimiitinneqassanngilarli. Suliniutit minnerpaamik marluutillugit ataqatigiissaakkamik iliuuseqartoqarnissaa kissaatigaarput, pingaarnertulli innuttaasut akiitsullit qanimut siunnersorteqarlutillu isumaginninnikkut suliniuteqarfigineqarnissaat Ilanngaassiviup saniatigut aamma aallartinneqarnissaa ilungersuutigissavarput, Bendt B. Kristiansen oqarpoq.

AAMMA ATUARUK Ilanngaassivik akiligassanittartunuinnaq atuutissaaq

AAMMA ATUARUK Ilanngaassivik er ikke en god løsning