Innuttaasunik taasititsinissaq IA-p aalajangiusimaannarpaa

Innuttaasut urani pillugu taasitinneqarnissaat Inuit Ataqatigiit ilungersuutigiinnarniarpaat.
Assi © : Inuit Ataqatigiit
juunip 13-at 2016 05:31

Partiip Narsami aasaanerani ataatsimiinnermini uranilu pillugu isumasioqatigiissitsinermini tamanna naqissuserpaa.

- Demokrati paarilluarlutigu innuttaasunik taasititsinissaq Inuit Ataqatigiit suli siunnerfigaarput, partiip siulittaasua Sara Olsvig tusagassiorfinnut nalunaarummi taama allappoq.

Tamatumunnga peqatigitillugu naggueqatitta, soorlu Nunavummiut,  suleqatiginerunissaat partiip kaammattuutigaa.

Aamma atuaruk Isumasioqatigiinneq uran pillugu oqallinnermik aallartinneqarpoq

Nunavummit Nunavut Makituganarningineersut urani pillugu isumasioqatigiinnermi saqqummiipput. Saqqummiussaasa ilagaat Nunavummi Nunavut Impact Review Board, innuttaasut immikkut naliliisartuutitaat Inatsisartunut Naalakkersuisunullu innuttaasut sinnerlugit innersuussuteqartartut.

- Naggueqatitsinnut attaveqarnerunissaq, aamma uranimut tunngasuni, pisariaqarpoq. Uranimut isummerniarnermi Nunatsinnisut inissisimasut kisimiinngilagut. Nunavummili uranisiornissaq unitsikkallarneqarpoq, Sara Olsvig oqarpoq, isumaqarlunilu Nunavummiut aalajangiiniarnermi periuuserisaat misilittagaallu ilinniarfigisinnaagigut.