Innutaasut taasisinneqarnissaat piumasaraa

Kommunilli avinneqarsinnaanera innuttaasut atugaasa assigiinngeqisut assigiinnerulersinnissaannut suliniuteqarnermut  akornutaasinnaavoq, borgmesteri taama isummersuuteqarpoq.

Isak Hammond, Kristian Jeremiassenip aamma Knud Kristiansenip Qaasuitsup Kommuniata avinneqarnissaanut siunnersuutaannut akerliulluni siorna taasisoq, maanna isumaqarpoq Qaasuitsup Kommuniani innuttaasut periarfissinneqartariaqartut kommuunip avinneqarnissaanut taasisinnaanerannut. Isak Hammond isumaqarpoq innuttaasut taamatut kommunalbestyrelsimut qinersinermi aapriilip aappaani periarfissinneqartariaqartut:

-   Isigiuaannarsimavara innuttaasut tamanna namminneerlutik aalajangigassarigaat. Politikerit immaqa qanoq isikkoqarsinnaanera immaqa aalajangiiffigisinnaavaat. Kisianni pingaartippara innuttaasut namminneerlutik taasissutigissagaat kommuunerujussuup qanoq inissisimasinnaanera. Avinneqassanersoq imaluunniit avinneqassannginnersoq, Isak Hammond oqarpoq.

Kristian Jeremiassenilli, Isak Hammondimit siorna siunnersuumminut taperserneqanngitsup, Isak Hammondip siunnersuutaa piviusorsiortuunnginnerarpaa:

- Matuma ersiutigiinnarpaa qinersinissap qanilliartornera, aamma qinigaaqqinnissaq taanna kisimi kissaatigineqaannartoq innuttaasut pingaarnerutinnagit, Kristian Jeremiassen oqarpoq.

Kisianni Isak Hammond isumaqarpoq kommuunip avinneqarnissaanut isummernissaq kommunalbestyrelsip nunaluunniit tamakkerlugu politikerit aalajangigassarigaat:

- Innuttaasut 18000 missarpiaaniittut inuit 21-it aalangernerat tamakkiisutut aalajangernertut uanga isiginngilara, Isak Hammon oqarpoq.

Politikerit taakkua marluk siunniussaminnut isumaqatigiissinnaanngitsut, borgmester Jess Svane isumaqarpoq Qaasuitsup Kommuniata avinneqarnissaanut tunngavissaqartoq:

-   Isumaga malillugu taasisitsinissamik eqqarsaraanni, taava oqaannartoqarsinnaanngilaq avissua imaluunniit avissanngila? Tunngavilersorluagaasariaqartutut uanga isumaqarfigivara. Pissutigalugu aaqqissuusseqqinneq tassaammaat inuiaqatigiit atugaasa assigiikkunnaarnerujussuat nalimmassartariaqarmat. Taannalu allanngortinniarneqassappat uanga isumaqarpunga tunngavilimmik, tunngavissarissaarluni ingerlanneqartariaqartoq, Jess Svane oqarpoq.