Innarluutillit Danmarkimut nassiuttarpaat

Neqeroorutaasinnaasut tamakku KANUKOKA-p, inunnik isumaginninnermi pisortat, innarluutilinnillu kommunini sisamani sullissisut peqatigalugit, Danmarkimut paasisassarsiorlutik angalanerminni ulluni kingullerni misissuataarpaat.

- Uterutta angalanerput KANUKOKA-p siulersuisuini nalilersussavarput, kalaallillu Danmarkimi innarluutillit angerlarsimaffianiitinneqartut Nunatsinnut angerlartinneqassanersut politikerit eqqartorumaarpaat. KANUKOKA-p siulittaasua, Martha Abelsen oqarpoq.

Innarluutilinnik innorluutilinnillu kommunit maanna Danmarkiliartitsinaveersaarput, Danmarkimili neqeroorutit Nunatsinnut naleqqussarneqarsinnaanersut misissortarpaat. Innarluutillilli ataasiakkaat Danmarkimut nuutinneqartarnissaat suli pinngitsoorneqarsinnaanngilaq, atugassarititaasut pisariaqartitaat Nunatsinnit neqeroorutigineqarsinnaanngimmata.

Danmarkimi angerlarsimaffinnut assigiinngitsunut pulaarnerput paasisaqarfigeqaarput, Martha Abelsen oqarpoq.

Innarluutilinnut innorluutilinnillu akisussaaffiup kommuninit tiguneqarnissaanut nalilersuinermut atatillugu angalasoqarpoq. Nunatsinniit angalasut Danmarkimi Sjællandimi kommunit sisamat, kalaallit innarluutillit innorluutillillu inissinneqarfiginerusagaat, suleqatigiinnissap ataqatigiissaarnissaanut oqaloqatigiinnermut aamma atorpaat.