Uummannami innuttaasunik ataatsimeeqateqarnermi inissiat taarsiissutit piniutillu annaasat initusut
Inissiat taarsiutit piniutillu Uummannami innuttaasunik ataatsimiititsinermi oqaluuserineqangaatsiarput. Karrat Kangerluanni 2017-imi tassaarsuaqareernerata kingorna Nuugaatsiarmiut Illorsuarmiullu illuisa taartissaannik inissianik Naalakkersuisunit tunineqarput. Inissialli nutaarsuit sannarlutaaqisut ilaallu oqunnissaminut ilimanaateqartut, nuutsitaanikut ilaat ataatsimiinnermi oqarput.
Tassaarsuartoqarsinnaaneranik misissuinermi kingullermi paasisat aallaavigalugit Naalakkersuisut sapaatit akunnerani matumani Uummannap sulluani innuttaasunik arlaleriarlutik ataatsimeeqateqarput.
AAMMA ATUARUK Ujarassiooq Karrat Kangerluat pillugu: 2017-imi pisumit ajornerujussuusinnaavoq
Ataatsimiititsinerillu ullumi pingasuupput, Illorsuarmiunut, Nuugaatsiarmiunut Uummannarmiunullu. Avatangiisinut naalakkersuisoq, Kalistat Lund, Namminersorlutik Oqartussani ujarassiooq, Jonas Petersen Avannaata Kommuniani pisortaaneq, Nick Nielsen ilaatigut peqataapput.
Qaqqamut qimaarusuttoq
Illorsuarni najugaqarsimasut arlalinnik apeqquteqarput, assersuutigalugu aalisartoq piniartorlu, 54-inik ukiunik Aligot Ottosen, sillimmasiisarfiit pillugit apeqquteqarpoq.
Saqqummiinermi politiiniit inassuteqaatit ilaat imaakkami, tassaarsuartoqalissagaluarpat aalisartut piniartullu pigisatik, piniutit, allallu sakkut umiatsiallumi annaanniaqqaarnagit ingerlaannartumik qatsissumut qimaassasut.
Assi: Aligot Ottosen.
- Politikommissærip nassuiaaneratut oqarfigineqarpugut sissamukassanngilagunngooq, pigisagut nalillit ornissanngilagunngooq qaqqamunngooq qimaassuugut.
- Soorunami naalakkiutigineqartut naalassuakka, qaqqamut qimaassaanga, Aligot Ottosen, KNR-imut oqarpoq.
Illorsuarnilu 2017-imi tassaarsuartoqarmat, Aligot Ottosen pigisaminik annaasaqarnermini sillimmasiisarfimmut ukiorpassuarni akilersuigaluarni taarsiiffigineqarsimannginnini nuannarinagu annguppaa.
- Tassaarsuaqarmat pigisatsinnik illuutitsinnik, aalisarnermut atortutsinnik piniutitsinnik sillimmasersukkatsinnik paasiniaasimagaluarpugut taarsiiffigineqarsinnaanerluta. Kisiannili tassa tassaarsuaqarneranigooq taarsiisoqarsinnaanngilaq aali pinngortitap innarligaanut allaat sillimmasersuinikuugaluarluta.
Kommune akissutissaasuasoq
Avannaata Kommuniani pisortaaneq, Nick Nielsen apeqquterpassuit ingerlaannartumik akinngilai, apeqquteqartullu aperereeraangata arlaleriarluni akisarpai, apeqqutai allallugit kingusinnerusukkullu uterfigiumaarlugit.
Avatangiisinulli Naalakkersuisup, Kalistat Lundip, apeqqutit sumulluunniit tunngangaluartut akerusuppai, soorlu ineqarnermut, aalisarnermut, isumaginninnermullu tunngasut apeqqutigineqaraangata Naalakkersuisunut ilaasortanit allanik akisussaaffigineqaraluartut akisarpai, KNR-imiillu aperaarput avatangiisinut tunnganngitsut aamma akisinnaatitaanerai akivoq, Maani Uummannamiilluni apeqqutit tamaasa akerusullugit taakkualu ingerlateqqikkumaarnerarlugit.
Qulakkeerniarneqartoq ilisarineqanngitsoq
Nunaqarfiit tassaarsuarmit eqqorneqarmata, nunaqartullu qimagutsinneqarmata inissianik Naalakkersuisunit Avannaata Kommuniani najugassaannik tunineqarput. Nuutsitaasimasulli iluaagisaqarlutik ataatsimiinnermi arlaleriarlutik oqartarput.
AAMMA ATUARUK Qimagutsinneqartut inissiartaartussanngortut
Ineqarnermummi Attaveqaqatigiinnermullu naalakkersuisuusimasoq, Simon Simonsen, 2018-imi nassuiaavoq, tamat assigiimmik pineqarnissaat sapinngisamillu amerlanerpaat isumagineqarnissaat tunngavissatigut qulakkeerneqassasoq.
Tamannali nuutsitaasunit amerlasuunit ilisarineqanngilaq. Akerliganilli assigiinngitsorujussuarmik pineqartarnerminnik oqaluttuarput.
Naalakkersuisut siulittaasuat, Múte B. Egede, Uummannami ataatsimiinnerni peqataanngilaq. Taanna Nuummut aallareerpoq, sapaatit akunnerini aggersuni pingaarutilimmik suliassaqarnini tamatumunnga peqqutaanerarpaa.