Inissaqartitsiniarneq iliuuseqarfigineqarli
Nuummi utaqqisut allattorsimaffiinut allatsissimasut amerlasuupilussuupput, inissiallu sanaartukkat nutaat amerlanersaat pisortani atorfilinnut atugassanngortinneqartarlutik. Kalaallit nalinginnaasut taamaasillutik inissaqarniarnermikkut ajortupilussuarmik inissisimatinneqarput. IA-p qinigassanngortitaata Nikoline Ziemerip tamanna iliuuseqarfiginiarpaa.
-Assersuutigalugu Nuummi ullumikkut taamatut inissisimasoqartillugu inissiamik attartortakkamik nalinginnaasumik pissarsinissamut periarfissaqanngilaq. Inissiat Namminersorlutik Oqartussani kommuninilu atorfilinnut aammalu inunnut immikkut pisinnaatitaaffilersukkanut sulisorissallugit pissarsiariuminaatsunut sulisoriinnarnissaannillu ajornartorsiutigineqartunut taamaallaat tunniunneqartarput. Kalaallit nunaqavissut appasissumik ilinniagallit imaluunniit ilinniagaqanngitsut kingullersanngortinneqartarput. Maani nunatsinni ilaqutariit angerlarsimaffeqanngitsuunerat akuersaarneqarsinnaanngilaq - aamma ataataq erninilu arfinilinnik ukiulik angerlarsimaffissaqartinneqannginnerat akuersaarneqarsinnaanngilaq. Tamanna allanngortinneqartariaqarpoq, Nikoline Ziemer oqarpoq.
Inissaaleqisut amerlasuutigut nalaasaarfimmi imaluunniit natermi ulluni marlussunni sinittariaqartarput. Amerlasuutigullu ajoraluartumik ilaqutariit meerartallit unnuiffissarsiortariaqartarput, taamaalisoqartillugulu meeqqamut pitsaanerusussap sianigineqarneranut sunniuteqanngitsoorneq-ajorluni.
-Tamanna pissutigalugu INI a/s-ip allanngortinneqarnissaa siunnersuutigaara, nalinginnaasumik attartortittakkanut inissiaatileqatigiiffimmut pisariaqassappallu sulisunut inissiaatileqatigiiffimmut. Pisortat suliffeqarfiutaat atorfinnut atasumik inissiaqartitsiniarunik, taava namminerisaminnik inissiaateqartariaqarput - inissianik nalinginnaasumik inissiatut attartortittakkatut siunertaqaraluartunik tigooraaginnartarnerat unitsinneqartariaqarpoq, Nikoline Ziemer nassuiaavoq.