Ingerlatseqatigiiffiup uranisiornini unitsikkaa
Franskit uranisiorfiata, Oranop nunatsinni uranisiornini unitsippaa.
Sermitsiaq.ag taama allaaserisaqarpoq.
Ingerlatseqatigiiffiulli uranisiornissamut akuersissuteqarfigineqarnini tigummiinnarpaa. Akuersissutit ukiuni tallimani atuupput.
- Naalakkersuisoqatigiileqqammersut sammivissatut aalajangigaat ataqqivarput, taamaammat Kalaallit Nunaanni piffissami matumani uranisiornermik aallartitsinianngilagut, Orano sermitsiaq.ag-mut oqarpoq.
AAMMA ATUARUK Ingerlatseqatigiiffik nunatta kujataani uranisiornissamut akuerineqartoq
Naalakkersuisut siulittaasorisimasaata, Kim Kielsenip ingerlatseqatigiiffik Orano nunatta kujataata kitaani nunattalu kujataani sumiiffinni arlalinni uranisiornissamut akuersissuteqarfigaa. Aatsitassarsiutileqatigiiffik sumiiffinni marlunni misiliummik assaanissamut akuersissuteqarfigaa.
Aamma Greenland Mineralsimut iluatsippallaartoqarpasinngilaq. Aatsitassarsiutileqatigiiffik taanna nunatta kujataani Kuannersuarni suliniummi eqqartugaasumi aatsitassarsiorniartuuvoq.
Suliniut taanna juunip ulluisa aallaqqaataata tungaanut tusarsiaassutigineqarpoq. Tusarniaanerli sivitsorneqaratarsinnaasoq, Aatsitassanut naalakkersuisoqarfiup pisortaata, Jørgen Hammeken-Holmip Sermitsiamut oqaatigaa.
Inuit Ataqatigiit Naalakkersuisut siulittaasoqarfianniilerneranniilli aatsitassarsiornermik suliniuteqartut uranimik piiaarusuttut politikkikkut iluatsitsinngillat.
AAMMA ATUARUK Aatsitassanut Naalakkersuisoq: Aatsitassarsiornissamut aap uranimut Kuannersuarnullu naagga
Inuit Ataqatigiit Kuannersuarni suliniuteqarnissamik unitsitsinissaq ilaatigut qineqqusaarutigaat.
Partiit Naalakkersuisuni Naleraq maanna suleqatigaa. Taakkulu aatsitassarsiutileqatigiiffiup suliniuteqarnera qinngornernik ulorianartunik piiaanissamik ilaqarnera pissutigalugu unitsinniarlugu neriorsuutigaat, tamanna naalakkersuisoqatigiinnissamut isumaqatigiissutaanni allassimavoq.
- Isertussanngilara tamatuma ingiaqatigisaanik uranimik piiaanissap pinngitsoortinnissaanut – aamma Kuannersuarni suliassamut tunngatillugu – inatsisip aamma aatsitassarsiorluni misissuinissamut akuersissutip killissaasa iluanni periarfissat suunersut nalilersussagakkit, aatsitassanut naalakkersuisoq nutaaq, Naaja Nathanielsen oqarpoq.
