Ingerlatseqatigiiffik nunatta kujataani uranisiornissamut akuerineqartoq
Naalakkersuisut franskit aatsitassarsiuteqatigiiffiannut Orano Mining Limitedimut nunatta kujataata kitaani kujataatalu kangiani uranimik ujaasinissamut marlunnik akuersissuteqarput.
Sermitsiaq.AG taama allaaserisaqarpoq.
Kuannersuarni aatsitassarsiornissamik suliniutip oqallisigineqaleruttornerani akuersissuteqartoqarpoq. Peqatigiiffiit politikerillu qassiiusut uranimit qinngornernik ulorianartunik mingutsitsisoqarnissaa ernumassutiginera pissutigalugu suliniut taamaatiinnaqquaat.
Aatsitassarsiutileqatigiiffik Orano Mining sumiiffinni marlunni misiliummik assaanissamut akuersissuteqarfigineqarpoq. . Siulleq nunatta kujataani Arsuup Kangilinnguit, Narsarsuullu avannaaniippoq.
AAMMA ATUARUK Naalakkersuisoq: Kuannersuarni seernartulinnik kinitsivik isumassarsiatsialaavoq
Sumiiffiup aappaa marlunnik immikkoortulik Iluliliup Paatsusullu kangerluini Kangerlussuatsiaallu kangerluaniippoq.
Ingerlatseqatigiiffik sumiiffimmi uranimik nassaassaguni piiaanissamut akuersissuteqarfigineqarnissaq Orano Mining Limitedip naatsorsuutigisinnaanagu akuerinikuuaa.
- Misissuinissamut akuersissut naalakkersuisoqarfinni assigiinngitsuni kujataanilu kommunimi tusarniaaffigineqarnikuuvoq, ingerlatseqatigiiffiullu piumasaqaatit immikkuullarilluinnartut misissuinissamut akuersissummut ilaasut akuerai, aatsitassanut naalakkersuisoq, Jens-Frederik Nielsen (D) Sermitsiaq.AG-mut oqarpoq.
Kuannersuarni aatsitassarsiortoqarnissaata piviusunngornissaanut suli suliassaqaaluppoq.
Suliniut pillugu innuttaasunut ataatsimiititsinerit pilersaarut malillugu februaarip ulluisa tallimaannit qulingiluaannut ingerlanneqartussaapput. Suliniutip tusarniaassutigineqarnranut akissummik nassiussinissaq marsip ulluisa aqqaneq aappaata tungaanut periarfissaavoq.
