Vittus Q: Løkkep naalakkersuisuinik Aleqap tapersuisunera akornutissaqatinngilaa
Partii Nunatta Qitornai folketingemi sulinermi qaammammut 75.000 kr-nik amerlanerusunik tapiissutisisalernissaa Vittus Qujaukitsup qilanaarivaa.
Aleqa Hammond folketingemi attaviitsumut ilaasortaasimalluni, Folketingemi partii Nunatta Qitornai sinnerlugit sisamanngornermi ilaasortanngorpoq.
Tamatuma kingunerilissavaa, partiip danskit naalakkersuisui tapersersortussanngoramigit, ministeriunerummi Lars Løkke Rasmussenip polikkerivaa, naalagaaffeqatigiinneq maannakkutut attatiinnarneqassasoq. Tamannalu Nunatta Qitornaata politikkianut naapertuutinngilaq, partiip Kalaallit Nunaata namminiilivinissaa kissaatigimmagu.
- Aleqa Hammond Grønlandsudvalgemi danskit naalakkersuisuinik suleqaternera ataatsimilluunniit apeqqusersinnaanngilara, sulinitsinnut allannguisussaanngimmat, Vittus Qujaukitsoq taama oqarpoq.
Vittus Qujaukitsup innersuussutigaa, Aleqa Hammond danskit naalakkersuisuinik isumaqatigiissuteqarmat, Kalaallit Nunaat pillugu ataatsimiititaliami siulittaasuunermigut, danskit naalakkersuisuisa ikinnerussuteqalinnginnisssat qulakkeermagu.
AAMMA ATUARUK Aleqa Hammond Inatsisartunut ilaasortanngunngitsoq
Taamatut isumaqatigiissuteqarnermi danskit naalakkersuisuisa amerlanerussuteqarnerisa ataatsimik ilaaneqarlutik qulakkeerneqarmata.
- Aleqa Hammondip folketingermi sulinermigut isummersorsinnaanera killilersugaanngilaq, aamma taanna aallaavigalugu naatsorsuutigilluinnarpara, nunatta inuisalu soqutigisai sallerpaatillugit pisarnermigut sulinini ingerlatiinnassagai, Nunatta Qitornaata sinniisaattut, Partii Nuntta Qitornaata siulitttaasua Vittus Qujaukitsoq taama oqarpoq.
AAMMA ATUARUK Aleqa Hammond ataatsimiititaliami pisortatigoortumik siulittaasunngortinneqalersoq
Aleqa Hammond attaviitsuunerminiit partiimut ilaasortanngornermigut aningaasatigut atorsinnaasai malunnaatilimmik amerleriassapput, tassalu partiimut ilaasortaanermigut qaammammut tapiissutit 75.000 kr-nik amerleriaateqassammata.
- Tamanut iluaqutaasussaavoq soorunami, aamma qularnanngilaq Nunatta Qitornaanut allarterlaamut tamassuma iluaqutaanissaa qularinngilluinnarpara, Vittus Qujaukitsoq marlunngornermi inatsisartunut qinersisoqarmat qinigaasoq taama oqarpoq.
AAMMA ATUARUK Aleqap Nunatta Qitornai qaammammut 75.000 koruunnik pissarsissuppai
