Cannabis nakorsaatitut akuerisaq Nakorsaatitut suli atorneqanngilaq
Kalaallit Nunaanni perulullutik napparsimasunut cannabis nakorsaatitut kuseriaatitut iisartakkatulluunniit immikkut ittumik tunniussisinnaanermut ukioq manna marsimili akuersissutigineqarsinnaalerput.
- Napparsimasut ulluinnarni inuunerat pitsaanerulersittariaqarparput nakorsaatinik taamaattunik iluaqutaasinnaasunik. Taamaattumik naammagisimaarpara maanna napparsimasunut ataasiakkaanut nakorsamik akuersissuteqarnikkut illersorneqarnikkullu taamatut aaqqiissuteqarsinnaagatta, Agathe Fontain taamanikkut taama oqarpoq.
AAMMA ATUARUK Cannabis nakorsaatitut atorneqalernissaa akuersissutigineqarpoq
Cannabisili Kalaallit Nunaanni napparsimallutik peruluttunut suli tunniunneqarsimanngilaq. Peqqinnissaqarfiup KNR-imut ilisimatitsissutigaa cannabisimik immikkut ittumik akuersissutigineqartumik tunniussisoqarnissaanik suli pissutissaqanngitsoq.
- Napparsimasut ataasiakkaat nalilersorneqartarput. Peqqinnissaqarfimmi tamanna nalinginnaavoq, katsorsartinneqarnissarlu naleqquttoq neqeroorutigineqartarluni. Tamanna aallaavigalugu Peqqinnissaqarfik cannabisip nakorsaatitut atorneqarnissaanut akuersissummik tunniussinissamik suli pissutissaqarsimanngilaq, Peqqinnissaqarfiup Aqutsisoqarfia KNR-imut emailimi taama ilaatigut allaaserisaqarpoq.