Naalakkersuisut meeqqanut ajornartorsiortunut 7,5 milliuunit koruunit tungaannut aningaaaliisut
Nunatsinni meeqqat inuusuttuaqqallu ikiorserneqarnissaannut aningaasaliissutissanik Folketingip katillugit 80 millioner koruuninik immikkoortitsinera Naalakkersuisut nuannaarutigaat.
Isumaginninnermut naalakkersuisup maanna neriuutigaa Inatsisartut aappaagumut aningaasaqarnermut inatsissaq ullumikkut akuersissutigissagaat, taamaalillutimmi suliassaq pingaarutilik aallartissinnaalissangamikku, naalakkersuisoq oqarpoq.
Nunatsinni meeqqanut suliniuteqarnissamut ukiumut 20 millioner koruunit 2023-p tungaanut immikkoortinneqartassasut qallunaat aningaasanut inatsisissaminnut isumaqatigiinniarnerminni isumaqatigiissutigaat.
Namminersorlutik Oqartussanit ilisimatitsissutigineqarpoq meeqqanik inuusuttuaqqanillu sullissineq sammivinnik pingasunik sammivilerlugu aaqqissuunneqassasoq:
- Pissutsit meeqqamut pingaaruteqartut, inooqatigiinni suliniutit kisiisa eqqarsaatigalugit aamma oqartussaasoqarfiit assigiinngitsunik suliallit akornanni suleqatigiinnermit suliniutigineqartut, Kalaallit Nunaannilu meeqqat inuusuttullu atornerlunneqartarnerannut pitsaaliueqataasussat kiisalu meeqqanut inuusuttunullu innarlerneqarsimasunut imaluunniit sumiginnarneqarsimasunut suliniutit pitsaanerulersinneqarnissaannut suliniutit tunngassuteqartut suliarineqassapput. Tassani ilaatigut sulisunik suliamik suliaqartunik ilinniartitsineq/ilinniartitseqqinneq, ilaqutariinnut ineqarnikkut pissutsit pitsaanerusut il.il. pineqassapput.
- Pissutsit inersimasumut kannguttaatsuliortumut, sumiginnaasumut il. il. pingaaruteqartut. Sammivik inersimasut innarliinissaannik pitsaaliuinernik ilaatigut suliniutinik imaqassaaq. Sammivimmi immikkut inatsisinik atuutsitsinermi suliassaqarfik ukkatarineqassaaq, assersuutigalugu innarliisoqarsimatillugu pinerluttoqarsimanernik paasiniaanerit, kisianni aamma suliassaqarfiit allat aamma pissutsit soorlu kannguttaatsuliortut pitsaanerusumik katsorsartalerneqarnissaat sammivimmi ukkatarineqassallutik.
- Atituumik pitsaaliuinermik suliniuteqarneq. Tassani ilaatigut nalinginnaasumik kisiannili aamma atitunerusumik suliniuteqarneq pineqarpoq, taakkunani inuiaqatigiit avatangiisigineqartut ukkatarineqassallutik, assersuutigalugu paasititsiniaanerit aamma ilisimasat annertusarneqarnerat aqqutigalugu.
Aningaasat immikkoortinneqartut suliniutinut ingerlareersunut ataqatigiissagaassapput ilanngunneqarlutillu, taama Naalakkersuisut tusagassiuutinut nalunaaruteqarlutik allapput.
AAMMA ATUARUK 80 millionit koruunit kalaallit meerartaannut Folketingimit aningaasaliissutigineqarput
Maannalu tassa nunatsinni aappaagumut aningaasaqarnermut inatsissap isumaqatigiissutigineqarnissaa utaqqiinnarneqalerpoq, taannalu sisamanngornermi ualikkut inaarutaasumik suliarineqarpoq.
Naalakkersuisut Tasiilami nunattalu sinnerani isumaginninnermut suliassaqarfimmi suliniutit patajaallisarneqarnissaannut atatillugu ukiumut 7,5 millioner koruunit angullugit atorneqarsinnaasunnngorlugit aningaasanut inatsisissamut immikkoortitsipput.
- Aningaasanut inatsisissatut siunnersuut aqqutigalugu suliniummut akisussaassusermik tigusinerput soorunalimi aamma ilanngussinissatsinnut pisussaaffeqarnerput takutikkatsigu nuannaarutigeqaara. Taamaammat Inatsisartut 2020-imut aningaasanut inatsisissaq akuersissutigissagaat soorunami assorsuaq neriuutigaara, taamaalilluta meeqqat ikiorniarlugit pingaarutilimmik suliassaq sukkanerpaamik aallartinniassagatsigu, naalakkersuisoq Martha Abelsen tusagassiuutinut nalunaarummini taama oqarpoq.
