Inatsit tunngaviusoq pillugu ataatsimiititaliaq: Takujuminaassinnaagaluartoq sulingaatsiarsimaqaagut
Inatsit tunngaviusussaq pillugu Isumalioqatigiissitat ukiumoortumik 2020-mut nalunaarusiartik sisamanngornermi, juunip ulluisa 24-anni saqqummiuppaat.
Nalunaarusiap siulequtaani oqaaseqatigiit siulliit ima allassimapput:
'Isumalioqatigiissitat ukioq 2020 sulingaatsiarsimaqaat, naak immaqa avataaniilluni suli sulianik pisortatigoortumik saqqumiivigineqarani takujuminaassinnaagaluartoq, Isumalioqatigiissitat Nunatta tunngaviusumik inatsisissaatut missiliuut siulleq inaarsarlugu paasiniaallutillu aaqqissuisimaqaat.'
AAMMA ATUARUK - Tunngaviusumik inatsisissaq pillugu isumalioqatigiissitaq sulerinersoq naluara. Iphonemilli eqquerusuppunga
Inuiaqatigiinnut paasititsiniaanissani erinaq ilisarnaatissatut atorneqartartussaq unammissutigineqarsimasoq, inatsimmik tunngaviusussamik sulineq pillugu aviisi paasissutissiisoq nuna tamakkerlugu inoqutigiinnut tamanut agguaanneqarsimasoq, TV-kkut paasititsiniutit unitsikkallanneqarsimasut inuillu 306-it iPhone 12-mik eqquiniaasitsinermut peqataasimasut nalunaarusiami allaqqavoq.
Isumalioqatigiissitat suleqatigiissitaat pingasut katillugit 25-eriarlutik 2020-mi ataatsimiissimapput.
Aningaasanut 2021-mut inatsimmi Inatsit tunngaviusussaq pillugu Isumalioqatigiissitat 2024-p tungaanut aningaasaliiffigineqaqqissanersut pilersaarutigineqanngilaq.
Isertuussineq
Inatsit tunngaviusussaq pillugu Isumalioqatigiissitat siulittaasuat, Ineqi Kielsen KNR-imut siorna decembarip ulluisa 21-anni ima oqarpoq:
- Tassa massakkumut inatsit tunngaviusussaq ilusissaatut suliarivarput. Taannalu isertuussatut ingerlakkallarparput.
Inatsit tunngaviusussaq pillugu Isumalioqatigiissitat nittartagaanni ima allaqqavoq:
'Suliakkiissummut najoqqutassiaq naapertorlugu innuttaasunik peqataatitsinissaq isumalioqatigiissitat naammassiniartussaavaat.'
Ukiup affaa maanna qaangiussimalerpoq, inatsilli tunngaviusussaq pillugu sulineq sumut killinnersoq paasiuminaappoq.
Inatsit tunngaviusussaq pillugu Isumalioqatigiissitat siulittaasuat, Ineqi Kielsen KNR-imit ullumi attavigaarput, taannalu ukiumoortumik nalunaarusiaq pillugu apersorneqarusunngilaq.
Inatsit tunngaviusussaq pillugu Isumalioqatigiissitat:
- Tunngaviusumik inatsisissaq pillugu isumalioqatigiissitaq
- Nunatta namminersulernissaanut tunngaviusumik inatsimmik suliaqartussaq Inatsisartut 2016-imi pilersippaat.
- Tassa imaappoq tunngaviusumik inatsimmik "kalaallit inuit kulturiannut, oqaasiinut, kinaassusaannullu tunngaveqartumik sinaakkusiisumillu" suliaqartoqassaaq.
- Tunngaviusumik inatsisissaq pillugu isumalioqatigiissitaq inatsimmik tunngaviusumik nutaamik siunnersuuteqassaaq.
- Siunnersuutit marluk tamanut tusarniaassutigineqassapput.
Tusarfik: tunngavik.gl
Taassuma isumalioqatigiissitap isumaqatigiittumik sulinera tunngavilersuutigaa.
KNR arlalinnik apeqqutissaqaraluarpoq - ilaatigut innuttaasunut isumaqatigiissitat suliaminnik saqqummiussisinnaanersut, tunngaviusumik inatsisissatut missiliuut siulleq inaarsarlugu ulapputigisimasaat arlaanni takuneqarsinnaanersoq, innuttaasunillu paasititsiniaanerminni 542.000 koruuninik atuinerusimanerat pillugu apererusussimagaluarpoq.
Inatsit tunngaviusussaq pillugu Isumalioqatigiissitani 2020-p naanerani uku ilaasortaapput: Siulittaasoq Ineqi Skourup Kielsen (S), siulittaasup tullia Kuupik V. Kleist (IA), ilaasortat Jens-Erik Kirkegaard (D), Aleqa Hammond (NQ) aamma Pele Broberg (PN). Immikkut ilaasortaatitaapput Daniel Thorleifsen, Inuuteq Holm Olsen, Lida Skifte Lennert, Mininnguaq Kleist, Rosannguaq Rossen aamma Sara Olsvig.
Taassuma saniatigut tallimat allattoqarfimmi atorfeqarput.
