- Tunngaviusumik inatsisissaq pillugu isumalioqatigiissitaq sulerinersoq naluara. Iphonemilli eqquerusuppunga
Ballongeqarpoq, saqqarmioqarpoq kuglepeneqarlunilu. Aamma inukkanik peqarpoq - taavalu Iphone 12-imik eqquisoqarsinnaalluni.
Tunngaviusumik inatsisissaq pillugu isumalioqatigiissitap suliaqarnini pillugu malunnartitsiniaqqammerpoq - taamaammallu Nuuk Centerimi nalliuttorsiualaartitsilluni.
Nunatta namminersulernissaanut tunngaviusumik inatsimmik suliaqartussaq Inatsisartut 2016-imi pilersippaat.
Tassa imaappoq tunngaviusumik inatsimmik "kalaallit inuit kulturiannut, oqaasiinut, kinaassusaannullu tunngaveqartumik sinaakkusiisumillu" suliaqartoqassaaq.
Tunngaviusumik inatsisissaq pillugu isumalioqatigiissitaq inatsimmik tunngaviusumik nutaamik siunnersuuteqassaaq.
Siunnersuutit marluk tamanut tusarniaassutigineqassapput.
Tunngaviusumik inatsimmut inaarutaasumik siunnersuut pilersaarut malillugu Naalakkersuisuinut ukioq ataaseq qaangiuppat tunniunneqassaaq.
Innuttaasut juullimut niuernialeruttortut atuagaaraq "Inatsit tunngaviusussaq pillugu sulineq - naatsumik" akeqanngitsumik puusiaatiminnut ikisinnaavaat.
Innuttaasut atuagaaqqami tassani isumalioqatigiissitaq - 2017-imi pilersinneqartoq inatsip tunngaviusup ilusissaanik suliaqarsimanera - sulilu suliaqarnera pillugu atuaqarsinnaapput.
Tunngaviusumik inatsisissatut siunnersuut ukiortaareerpat tamanut tusarniaassutigineqassaaq.
Taamaammat Tunngaviusumik inatsisissaq pillugu isumalioqatigiissitap sulerinera suli isertuussaagallarpoq.
- Tassa massakkumut inatsit tunngaviusussaq ilusissaatut suliarivarput. Taannalu isertuussatut ingerlakkallarparput, Isumalioqatigiissitap siulittaasua, Ineqi Kielsen oqarpoq.
- Inuttaasunut paasitinniarparput sooq tunngaviusumik inatsiseqarnissaq nunamut namminersortumut pingaaruteqarnersoq.
Nuuk Centerimi nalliuttorsiualaartitsinermi peqataasut tunngaviusumik isumalioqatigiissitap pillugu qanoq ilisimasaqarpat?
Ilisimasaqarpallaanngitsut paasinarpoq.
Luusi Møller Petersen KNR-imit apersukkatsinni siulliuvoq.
- Naamik. Logoa ilisaringajaavissinnaagaluarpara, kisianni sulereqqissaarnersut nalullugit, Luusi Møller Petersen oqarpoq.
- Iphonimik eqquisinnaasungagooq oqarfigitikkama. Sorleq pinerpoq. Aah iphone 12 aana allaqqavoq, Per Jeremiassen oqarpoq, taassuma tunngaviusumik isumalioqatigiissitaq sulerinersoq aamma ilisimaqqissaanngilaa.
Aamma Beathe Kreutzmann tamanna nalugaluarlugu peqataavoq.
- Una inatsit tunngaviusussaq pillugu sulineq naatsumik oqaluttuaralugu qimerluualaarusukkakku. Atuarnerani immersugassaqarami taava eqqugassaqarluni. iPhone 12 eqqorusukkakku, Beathe Kreutzmann oqarpoq.
Kammagiit Nukannguaq Lukassen Paneeraq Larsenilu aamma peqataapput.
Tunngaviusumik inatsisissaq pillugu isumalioqatigiissitaq sulerisarnersoq nalunngilisiuk?
- Naamik takkutiinnapajukkama aatsaanuna iseqqammertugut, Paneeraq Larsen oqarpoq.
Uju Petersen aamma najuuppoq. Taanna Kommuneqarfik Sermersuumi borgmesterip tullersortaani siulliuvoq - taassumalu inatsit tunngaviusussaq pillugu isumalioqatigiissitap suliai nalornissutiginngilai:
- Isumaqarpunga inuiaqatigiinni inatsit tunngaviusoq pillugu sulineq soqutiginartuusoq. Nunatsinni allanngueqataanissaq namminiilivinnissap tungaanut ikaarsaariarnissamut isumalerujussuusoq isumaqarpunga, Uju Petersen oqarpoq.