Inatsit nutaaq ataatsimiititaliarsuup innersuussutaanut akerliuvoq
Aalisarneq pillugu ataatsimiititaliarsuup inassutaasa ersarinnerit ilagaat aalisartut ikilisariaqarnerat taamaasilluni sinneruttut pitsaanerusumik aningaasarsiorsinnaaniassammata. Naalakkersuisulli siunnersuutaat malillugu akerlerluinnaanik pisoqartussanngorpoq tassami siunnersuut akuerineqassappat aalisariutitaarniarneq ajornannginnerulissaaq.
- Oqartoqarsinnaalluarpoq aalisarnermi ajornartorsiutit pingaarnerit iluarsinissaannut siunnersuut aqqutaanavianngitsoq. Taamani uagut oqaatigaarput aalisarnermi isertitat ikippallaartut tamannalu iluarsiivigineqarsinnaasoq aalisartut ikilinerisigut. Allannguinissamut inassutit maanna siunnersuutigineqartumi ilalerneqanngillat, aalisarneq pillugu ataatsimiititaliarsuup siulittaasorisimasaa ilisimatooq Christen Sørensen KNR.gl-mut oqarpoq.
Aalisarneq pillugu ataatsimiititaliarsuup inassutaasa malinnissaannut inatsisiliortut malinnippallaarsimanngikkaluartut taamaattoq ataatsimiititaliarsuup siulittaasorisimasaa isumaqarpoq aalisarneq pillugu ataatsimiititaliarsuarmik pilersitsinissaq pisariaqarsimasoq.
- Siunertaa suli takusinnaalluarpara naak allannguutit amerlagisassaanngikkaluartut. Taamaanneranut pissutaannguatsiarpoq inuussutissarsiutit aalisarunnaartut periarfissarisinnaasaasa suli amigaataarnerat. Suliassat annertuut piviusunngussappata ilimagilluinnarpara aalisartut ikiliumaartut, kisianni tamanna aatsaat takusinnaalerumaarparput aatsitassarsiornermi aallartittoqassappat, Christen Sørensen oqarpoq.
Siunersuut uani takusinnaavat: http://www.inatsisartut.gl/dvd/EM2012/pdf/media/569978/pkt85_em2012_erhvervsfremme_lov_dk.pdf
Aalisarneq pillugu ataatsimiititaliarsuup isumaliutissiissutaa uaniippoq: http://dk.nanoq.gl/Emner/Landsstyre/Departementer/Departement_for_fiskeri/~/media/E03A2ECA9CBD4D45954B446C954D6963.ashx
