Inatsit allanngortittariaqarpoq
Politikeri IA-meersoq siornatigut susassaqarfik pillugu § 37 tunngavigalugu apeqquteqaateqarsimavoq, ilinniartulli angerlartut qitornaasa paarineqarnissaanut aaqqiissutissanik taamani siunnersuuteqartoqarani, maannalu Olga P. Berthelsenip Inatsisartut inatsisaata nr. 16-ip, susassaqarfimmut aalajangersaaffiusup, allanngortinneqarnissaa siunnersuutigaa.
-Nunatsinni sulisussanik ilinniarsimasunik annertuumik pisariaqartitsivugut, pingaartumik sulisussat Nunatsinnut attuumassuteqareersut nunatsinnilu pissutsinut ilisimasaqarluareersut. Tamanna pimoorullugu sulissutigineqarpoq, naammassineqarnissaali ilungersuunnerusariaqarparput, Olga P. Berthelsen naqissusiivoq.
Kalaallit Danmarkimi ilinniartut peqatigiiffiat Avalak nunatsinnilu kommunit kattuffiat KANUKOKA peqatigiillutik pissutsinik pitsanngorsaanissaq sapaatip akunnerata siuliani sulissutiginialerpaat, Palle Christiansenillu sisamanngormat knr.-gl-imi neriorsuutigaa kommunit peqatigalugit paaqqinnittarfinnik amerlanerusunik sanaartornissaq perorsaasunillu amerlanerusunik ilinniartoqarnissaa sulissutiginiarlugu. Piffissaq ungasinnerusoq ajornartorsiummut aaqqiissutaasinnaavoq, Olga P. Berthelsenilli inatsimmik allanngortitsinikkut ajornartorsiut ingerlaannaq aaqqikkusuppaa.
- Taamaaliornikkut kommunit kajumissuseqarluarlutik inatsimmik malinninnissaat neriuutigaara, taamaliornikkut Danmarkimi ilinniartortavut angerlarsinnaanngortillugit. Maanimi pisariaqarteqaagut. Ilinniartummi angerlarusupput, tamanna KANUKOKA-mik suleqateqarnerisa takutippaat, Olga P. Berthelsen naalakkersuisooqatigiit marsip 12-iata kingorna ingerlaannarsinnaassappata naalakkersuisunngoratarsinnaasoq oqarpoq.