Inatsisitigut ataataqanngitsuunerup sunniutai qulaajarneqartut
Frederik Lange Rasmussen inatsisitigut ataataqanngitsutut peroriartornermini inuiaqatigiinnit oqaatsit uku tusartuaannarpai:
- Soorlu pinnguaqatigiinnermi arlaanik uuminarsalaarsimaguma taava akerartuutit saqqummilertarput soorlu uersagarsuaq allallu. Qanoq? Ataataqanngitsoq uersagarsuarlu, Frederik Lange Rasmussen nassuiaavoq.
Immikkut isigineqarneq
Frederik Lange Rasmussenip meeraanermini immikkut isigineqarsimanini pillugu, inatsisitigut ataataqannginngitsuuneq pillugu saqqumilaartoqalermat aatsaat, eqqarsaatersuutigisalerpai.
- Soorunami qamuuna kamaammerpunga, tusarakku qanoq allatut uanga isigineqarsimasunga inatsimmi. Meeraq, saneralannguanni meeraq allatut taanna uannganut isigineqarsimasunga atugassarititaasullu aamma uagutsinnut inuunerput tamaat atuuttussanngorlugit aalajangiunneqarsimasut taassuma inatsisip ilaa. Annernarpoq paasillugu taamaattoq.
AAMMA ATUARUK Inatsisitigut ataataqanngitsut pillugit suliniutit sakkortusarneqalersut
Inatsisitigut ataataqanngitsuunerup inummut sunniutai pillugit qulaajaasoqarpoq, nalunaarusiarlu nutaaq saqqummiunneqarluni.
- Qulaajaanerup ilaatigut takutippaa inuiaqatigiinni nunatsinni inatsisitigut ataataqanngitsunut nikassaarpasinnermik naqisimanninnermillu ileqqoqarsimasugut. Tamannalu soorunami akuersaarneqarsinnaanngilaq, ilaqutariinnermut naalakkersuisoq, Sara Olsvig, oqarpoq.
Inatsisitigut ataataqanngitsut pisinnaatitaaffii pillugit inatsit ukiut pingasut atuussimalersup, Nunatsinni inatsisitigut ataataqanngitsut allat assigalugit ataatassarsiuisarnermut kingornussisarnermullu pisinnaatitaaffeqalerlerput.
49-t suliassanngortinneqartut
Maannamut 49-t missaat ataatassarsiuinermik suliassanngortitsisimapput. Taakkunannga 62-inik ukiulik Frederik Lange Rasmussen. Frederiup angummi peerutereersimasup kinguliaa ukiut marluk matuma siorna tiguaa kinaassutsiminullu iluaqutigisimaqaa.
- Ataatama meeraa Danmarkimi najugalik naapillugu taassumallu oqaluttuai aallaavigalugit inissikkiartuaalerpunga. Taavalu kinaassuseqalerlunga, tunummut qiviarfigisinnaasannik, Frederik Lange Rasmussen oqarpoq.
AAMMA ATUARUK Inatsisitigut ataataqanngitsut pisinnaatitaaffii pillugit innuttaasunik ataatsimiititsisoqalersoq
Inatsisitigut ataataqanngitsut pillugit suleriaqqinnissamut suliniutissat marluk saqqummiunneqarput.
Siulleq tassaalluni inatsisitigut ataataqanngitsut suuneranik qanorlu periarfissaqarnersut paasissutissiissutigineqartariaqartoq aappaattullu ataasiakkaarluni oqaloqatiginninnikkut katsorsarneqarnissamik periarfissaqalerneq.
Frederik Lange Rasmussenip katsorsarneqarnissamik kaammattuut isumaqatigaa, aammali:
- Inuk taamatut eqqugaasimasoq, atugaqartitaasimasoq piinnarnagu, kisianni aamma uanga isumaqarpunga taakkua meeraat aamma pinngitsooratik aamma sunnerneqassagamik, taakkulu uanga isumanni ilanngutsikkusussagaluarpakka, Frederik Lange Rasmussen oqarpoq.
AAMMA ATUARUK Inatsisitigut ataataqanngitsut pillugit paasititsiniaanissaq kinguaattoortoq
Meeqqanut isumaginninnermullu Ministereqarfimmit Namminersorlutillu Oqartussat suleqatigiillutik qulaajaaneq isumagineqarpoq.
Nalunaarusiaq tarnip pissusaanik ilisimasalimmit Jacob Lindholmimit suliarineqarpoq. Inatsisitigut ataataqanngitsut 17-it, taakkunannga arnat qulit angutillu arfineq marluk apersorneqarput.
