Inatsisitigut ataataqanngitsut pisinnaatitaaffii pillugit innuttaasunik ataatsimiititsisoqalersoq
Ataataassuseq kingornussisinnaatitaanerlu pillugit inatsimmut 2014-imi atortuulersinneqartumut tunngatillugu, inatsisitigut ataataqanngitsut qanoq pisinnaatitaaffeqarnersut innuttaasunik ataatsimiititsinerni paasissutissiissutigineqassaaq.
Inatsisip nutaap atortuulersinneqarnerata kingorna unammilligassaasimasut erseqqissumik suussusersinissaat pingaaruteqartoq, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisup, Sara Olsvigip, oqaatigaa.
- Innuttaasut pisinnaatitaaffitik pillugit isumaasa, iliuusissanillu allanik pisariaqartinneqartunik oqariartuutissaasa tusarnissaat qilanaaraara, naalakkersuisoq oqarpoq.
AAMMA ATUARUK Inatsisitigut ataataqanngitsut pillugit paasititsiniaanissaq kinguaattoortoq
Inatsisitigut ataataqanngitsunik taaneqartarput inuit katissimanerup avataatigut, Kitaani ukioq 1963 sioqqullugu aamma Tunumi ukioq 1974 sioqqullugu inun-ngorsimasut, ataatamillu kinaassusersinissaanik inatsisitigut manna tikillugu periarfissaqarsimanngitsut.
Ataataassuseq kingornussisinnaatitaanerlu pillugit maleruagassat nutaat 2014-imi atortuulersinneqarput, taamaalillutillu inatsisitigut ataataqanngitsut ataatamik kinaassusersinissaanik pisinnaatitaaffeqalerput, kingornusseqataasinnaanngorlutik (ataataasoq toqukkut qimagussimanngippat) imaluunniit ataatamik kinguliaanik kinguliaqalersinnaanngorlutik.
AAMMA ATUARUK Inatsisitigut ataataqanngitsut pillugit isiginnaartitsisoqartoq
Ataatassarsiuussinerup qanoq ingerlanneqartarnera, suliassallu suliarineqarnissaata qanoq ingerlanissaa innuttaasut innuttaasunik ataatsimiisitsinermi paasisaqarfigiumaarpaat.
Innuttaasunik ataatsimiititsinerit Nuummi januaarip 24-ani Ilulissanilu februaarip aappaani ingerlanneqassapput, sammisallu mianernartuunera attuumassuteqartullu eqqarsaatigalugit matoqqasumik ingerlanneqassapput,
AAMMA ATUARUK Inatsisitigut ataataqanngitsut pillugit paasisitsiniaaqqittoqassaaq
Innuttaasunik ataatsimiititsinerit paasisitsiniaanermik suliniummut, inatsisitigut ataataqanngitsuunerup inummut sunik sunniuteqartarneranik qulaajaanertaqartumut ilaapput. Qulaajaaneq Folketingip inatsimmut nutaamut atatillugu isumaliuutissiissummini kaammattuutigisaa maanna ingerlanneqarpoq, aasamullu tamanut saqqummiunneqarsinnaanissaa naatsorsuutigineqarpoq.
