Inatsisitigut ataataqanngitsut pillugit isiginnaartitsisoqartoq
Tusagassiortoq isiginnaartitsisartunngorniarlu Vivi Sørensen isiginnaartitsissummi "Mens vi venter på at indlandsisen smelter", kalaallisut "Sermersuup aannissaanut utaqqinitsinni" arnaata ataataqarnani Nunatsinni peroriartornerani misigisai aallaavigalugit isiginnaartitsisaqattaarpoq.
Isiginnaartitsissulli isiginnaartitsisumut aamma oqaluttuaavoq.
- Uanga nammineerlunga inuttut una oqaluttuaq oqaluttuarerusuppara pissutigalugu uanga nammineq aataannut tunngasuugami. Aataakka uanga ilisimasarinngilakka. Qanoq ileqqoqarnersut kikkuunersullu naluara. Taamaammat uannut aamma kinaassutsimik ujarlerneruvoq, Vivi Sørensen oqarpoq.
LINK
Suli oqaluuserineqartariaqartoq
Kalaallit Nunaanni meeqqanut inatsit naapertorlugu aappariinnerup avataatigut inunngortut kina ataatarinerlugu 1963-ip tungaanut paasinissaanut pisinnaatitaaffeqanngillat.
Inatsilli 2014-imi kingumut atuuttumik atorunnaarsinneqarpoq, taamanikkullu meeraasut ataatavitik pillugit paasissutissanik pissarsiorsinnaanngorput.
Inatsilli allanngortinneqarareeraluartoq pisimasut suli oqaluuserineqartariaqartut, Vivi Sørensen isumaqarpoq.
- Uku ajortut pinikut oqaluttuarisariaqaratsigit. Aniatitsisariaqaratta. Taamaasilluta qaangersinnaaniassagatsigit. Uanga isumaqarpunga qaangiinnapajussinnaanngikkigut oqarluta: "Pereerput". Isumaqarpunga oqaluuserisariaqarigut, taavalu allanut takutillugu qanoq innerluta, isiginnaartitsisartunngorniaq Vivi Sørensen oqarpoq.
Aamma atuaruk Inatsit allanngormat ataatassarsiuussinerit amerlisut
Inatsisitigut ataataqanngitsut kinguaavi
Vivi Sørensenip arnaa, Stina Sørensen isumaqataavoq.
Inatsisitigullu ataataqanngitsut kisimiillutik pisimasunit sunnertinngitsut, Stina Sørensenip oqaatigaa.
- Inatsisitigut ataataqanngitsut kinguaavi, aamma taakkua ilaquttaminnik qanigisaminnilluunniit ilisarisimasaqartariaqaraluarput, Stina Sørensen oqarpoq.
Isiginnaartitsissut Teater Momentumimi junip 18-iata tungaanut isiginnaarneqarsinnaavoq.