Inatsisitigut ataataqanngitsut pillugit suliniutit sakkortusarneqalersut
Inatsisitigut ataataqanngitsut pillugit suliniutit sakkortusarneqartussanngortut naalakkersuisup Sara Olsvigip nalunaarutigaa. Tamatumunngalu peqatigitillugu danskit naalagaaffiata suliassaqarfimmi maannamut paasissutissiisarsimanera isornartorsiorpaa.
- Eqqartuussivinnut saaffiginnittoqarsinnaaneranik, qanoq iliortoqarsinnaaneranik suullu nassarneqarnissaannik ilisimasaqarnissap qulakkeernissaanut danskit naalagaaffiata suliniuteqarnera naammassimanngilaq.
Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq, Sara Olsvig, taama oqarpoq.
Inatsisitigut ataataqanngitsut amerlasuut peroriartornerminni kannguttarnermik immikkoortitaanermillu misigisaqartarsimanerat qulaajaanermi nutaami oqaluttuarineqarpoq. Tamannalu pissutigalugu inersimasunngornerminni imminut nikaginermik ajornartorsiuteqartarsimapput.
Inatsisitigut ataataqanngitsut pisinnaatitaaffii pillugit inatsisip atuutilersinneqarneranit juunip aallaqqaataani ukiut pingasunngorput. Inatsisillu atuutilerneratigut Nunatsinni inatsisitigut ataataqanngitsut aappariinnerup avataani inunngortut allat assingalugit ataatassarsiusarnermut kingornussisarnermullu pisinnaatitaaffeqalerput.
Ikitsuinnaalli, 49-t missaat, ataatassarsiuinermik suliassanngortitsillutik pisinnaatitaaffitik atorsimavaat.
Nunatsinni inatsisitigut ataataqanngitsut suli inuusut 3.300-t missaanniittut, Danmarkimilu suli inuusut 1.300-t missaanniittut qulaajaanermi nutaami oqaatigineqarpoq.
Taamalu amerlatigitillugit tamatta akisussaaffilerneqarpugut, Sara Olsvig oqarpoq.
- Inuppassuit pineqarput, taamaammat taamatut inissisimaneq nalinginnaasutut oqaatigineqarsinnaavoq. Taamaammat aamma pissutsit inatsisitigut ataataqanngitsut atugarisaasa iluarsinissaat tamatta peqataaffigisariaqarput.
Pissutsit inatsisitigut ataataqanngitsut atugarisaat marluinnik suliniuteqarnikkut iluarsiniarneqassasut, nalunaarusiami kaammattuutigineqarpoq.
Paasititsiniaaneq sakkortusarneqassaaq, pisariaqartitsisunullu ataasiakkaarluni oqaloqatiginninnikkut katsorsagaanissaq neqeroorutigineqassalluni.
