Inatsisitigut ataataqanngitsut inatsisissamut siunnersuut nuannaarutigaat

Inatsisitigut ataataqanngitsut ataataqarnissaminnik pisinnaatitaaffeqarnissaannik ukiuni arlaqartuni suliniutigineqartut maanna inatsisiliuunneqalerpoq.  Inatsisissatut siunnersuut  danskit naalakkersuisuinit maanna saqqummiunneqartussanngorpoq.

Isumaginninnermut  nunasisullu akuunerulersinniarnissaannut ministeri, Karen Hækkerup, inatsisissamut siunnersuut decemberip qaammataani saqqummiutissagaa, Folketingimi inatsisit allattorsimaffianni saqqummiunneqaqqammersumi atuarneqarsinnaavoq.

Inatsisitigut ataataqanngitsut Nunarput tamakkerlugu siulittaasup Tida Ravnip tamanna nuannaarutigaa:

- Soorunalimi nuannaarutigaarput, utaqqikatannikuugaluarpugut, kisianni inatsisissamut siunnersuutip oqaasertai suli takunngilagut taamaattumik taakkua pissangassutigivagut, taamaakkaluartoq upperisariaqarparput tamanna Folketingimi suliarineqartussanngormat, Tida Ravn oqarpoq.

Kalaallit Nunaanni uersakkat 1963 sioqqullugu inunngortut, kina ataataginerlugu manna tikillugu paasiniarsinnaasimanngilaat. Inatitsissatut siunnersuummi kina ataatatiginerlugu paasiniarsinnaalissavaat.  Aviisi Kristeligt Dagblad taamatut allaaserisaqarpoq.

Inatsisissatut siunersuutip allassimanera suli avammut saqqummiunneqanngikkaluartoq,  Folketingimi inatsisit aalajangigassangorlugit saqqummiunneqartussat allattorsimaffiani allassimavoq, nunatsinni  1963 sioqqullugu inunngortut ataataminnit kingornusissinnaatitaalissapput, taassumalu ilaqutaannit aamma.

- Ataataasoq toqoreersoq kingornussallu agguaanneqareersut, qanoq sakkortutigisumik ilaqutaasut piumaffigineqassanersut nalunarallarpoq, Tida Ravn oqarpoq. Inatsissatut siunnersuutip oqaasertai maanna utaqqineqarput.

Inatsisitigut ataataqanngitsut kingornussissussaatitaanerat inatsisissatut siunnersuumi kisimi pineqanngitsoq Tida Ravn  isumaqarpoq. Kingornussisussaatitaaneq qanoq pingaartinneqartiginersoq Tida Ravnip ilisimanngilaa.

- Inuttut ataqqineqarnissaq aamma ataatamit taassumalu ilaqutaannit ataqqineqarnissaq pingaarnerpaasunut ilaavoq, Tida Ranv oqarpoq.

Danskit meerartaat uersakkat 1938-miilli  kina ataatatiginerlugu paasisinnaavaat aamma kingornussissussaatitaapput taamaatullu naggataanik naggateqarsinnaallutik. Kalaallit merartaat aatsaat 1963-imi pisinnaatitaaffik tamanna atorsinnaalerpaat. Tunumi nunattalu avannaani 1974-imi pisinnaatitaaffik tamanna atuutilerpoq.

Kalaallit meerartaat uersakkat inatsisit atuutsinneqarnissaa sioqqullugu inatsisitigut pisinnaatitaaffeqanngillat.