Upernaakkut ataatsimiinneq Inatsisissatut siunnersuuterpassuit
Inatsisartut upernaakkut ataatsimiinnerat ullumi aallartissaaq, inatsisissatut siunnersuutit aatsaat taama amerlatigalutik 101-ipput. Inuit Ataqatigiit siunnersuutaat amerlanersaapput 26-iugamik. Tamanna pillugu IAp siulittaasua Mute Bourup Egede ima oqarpoq:
- Siunnersuuteqarluarpugut, aamma upperigatsigu inuiaqatigiit kalaallit siuariartornissaanut toqqammavisseeqataasussanik tassuuna aqqutisseeqataasussaalluta.
AAMMA ATUARUK Innarluutilinnut inatsisip utaqqisinneqarnera akilersinnaalluarpoq
Demokraatit 18-inik inatsisissatut siunnersuuteqarput, taamaalillutik upernaakkut ataatsimiinneq kingullermit marloriaatingajammik amerleriarlutik, tamannalu ima tunngavilersorpaat:
-Tupaallannaartuugunanngilaq taama amerlatigisunik siunnersuuteqaratta, kingullermik issiagatta pingasuinnaavugut maannakkullu arfinilinnik inuttaqarluta taamaammat aamma amerliartorput siunnersuutigisartakkagut, Randi Vestergaard Evaldsen oqarpoq.
Ataatsimiinneq naliginnaasuussanngitsoq
Ataatsimiinneq ukiunut siuliinut sanilliullugu allaanerusussatut taakku takorloorpaat, Naalakkersuisut ikinnerussuteqarnerat naaperiaanissamik periarfissaqarnerulersitsinerarlugu.
AAMMA ATUARUK Niels Thomsen Inatsisartuni sulinerminit sulinngiffeqarallalerpoq
- Ikinnerussuteqarlutik Naalakkersuisoqarpugut taamaattumillu aamma politikkimi sulinermi naaperiaanissat annertunerujussuit massakkut sulissutigilernikuullutigit, Randi Vestergaard Evaldsen oqarpoq.
Inuit Ataqatigiit siulittaasuat taama aamma neriuppoq.
- Amerlanerussusiisinnaaneq kikkunninngaanniilluunniit maanna periarfissaqarfiuvoq, Mute Bourup Egede oqarpoq.
Inatsisartut upernaakkut ataatsimiinnera KNR 2-kkut aqqanerniit malinnaaffigineqarsinnaavoq.
