Inatsisartut qilalukkat kisinneqartussanngortikkaat
Tunumi qilalukkat aappaagu kisinneqarnissaanut aningaasanut inatsimmi 3,1 millionit koruuninik immikkoortitsisoqarli.
Inatsisartuni politikerit Naalakkersuisunut taama oqariartuuteqarput.
Partiit tunumi qilalukkat nutaamik kisinneqarnissaannut aqqutissiuussisumik ukiakkut ataatsimiinnermut siunnersuummik suliarinnillutik naammassinerata kingorna taama oqariartuuteqartoqarpoq.
Pinngortitaleriffik najukkami piniartumik peqateqarluni timmisartukkut kisitsissaaq.
Qilalukkat qernertat Tunumi ikileriarput
2008-mi kisitsineq aallaavigalugu, Ittoqqortoormiini qilalukkat qernertat 2000-it missaanniinnissaat biologit naatsorsuutigaat. 2017-imi taamaallaat qernertat 300-t missaanniipput.
Kangerlussuarmi qilalukkat qernertat 2008-mi 600-t missaanniit 2016-imi 300-t missaannut ikileriarsimapput. Tasiilami suli ikinnerupput.
Aasaanerani Ittoqqortoormiini, Kangerlussuarmi Tasiilamilu qilalukkanik qernertanik kisitsineq, ataatsimiinnerit, piniartut peqataatinneri misissueqqissaarnerillu ilanngullugit, 3.1 miliuuni koruuneqartoq, Pinngortitaleriffiup naatsorsuutigaa.
Pinngortitaleriffiup aamma uparuarpaa, taamatut kisitsinissaq aningaasanut inatsimmi Pinngortitaleriffiup annerusumik aningaasaliiffigineqarneranik imaluunniit iliuuseriniakkat pilersaarutaareersut pingaarnersiornerisa allanngortiternissaannik kinguneqartariaqartoq.
Najoqqutarisaq: Pinngortitaleriffimmi Miluumasunut Timmissanullu immikkoortortaqarfik
AAMMA ATUARUK Naalakkersuisoq nunatta kangiani qilalukkanik kisitseqqusisoq
Timmisartumiilli kisitsineq akeqarpoq.
Tunumi timmisartukkut kisitsineq 3,1 millionit koruuninik akeqassangatinneqarpoq. Aningaasat taakku aappaagumut aningaasanut inatsisissami nassaarineqassapput, tamanna suli inissinneqanngilaq.
Naalakkersuisut tunumi qilalukkat kisinneqarnissaat 2022-mut Aningaasanut inatsisip isumaqatigiinniutigineqarnerani ilaatinneqassasoq akissuteqaammi oqaatigaat.
Qilalukkat ikiliartortut
Politikerit Inuit Ataqatigiinneersut, Harald Bianco aamma Knud Mathiasen kiisalu Siumumeersoq Lars Poulsen siunnersuuteqartuupput.
Siunnersuulli piviusunngussasoq paasiniarlugu aningaasanut inatsimmi naammassineqarnissaa utaqqineqaqqaassaaq.
AAMMA ATUARUK Politikkikkut amerlanerussuteqartut qilalukkat nutaamik kisinneqarnissaannut aningaasaliiniartut
Uumassusilerisut oqarnerat naapertorlugu tunumi qilalukkat ikiartupiloorput.
Assersuutigalugu Pinngortitaleriffiup 2008-mi naatsorsorpaa, Ittoqqortoormiini qilalukkat 2000-it missaanniittut. 2017-imili 300-sut naatsorsorneqarpoq.
Tunumi qilalukkat eqqissisimatinneqarnissaat Pinngortitaleriffiup siunnersuutigaa. Tunumi qilalukkut aasaanerani nutaamik kisinneqarnissaat pisassiissuteqartoqannginnissaanut siunnersuuteqarnermut allannguinissaa ilimananngitsoq Pinngortitaleriffiup Naalakkersuisumut oqaaseqaammi erseqqissaatigaa.