Inatsisartut nutaat angutaannangajassuusut
Inatsisartunit ilaasortanit 31-nit 19-it angutaapput aqqaneq-marlullu arnaallutik. Ukiut sisamat matuma siorna qinersisoqarnerani siuaassutsit agguataarluarsimallutik amerlaqatigiingajapput, tassani angutit 17-iupput arnallu 14-iullutik.
Inatsisartuni nutaani siuaassutsit agguataarnerat nutaaq, tassalu pingasorarterutaat marluk angutaasut pingajorarterutaallu arnaasut - partiit annersaanni, Siumumi qulingiluanik ilaasortaatitaqalertumi, aamma takussavoq.
AAMMA ATUARUK Qinersinermi ajugaasut ajorsartullu
Partiimi tassani arnat pingasuupput tassaallutik, Doris Jakobsen, Vivian Motzfeldt Laura Taunaajillu angutillu arfinillit tassalu Kim Kielsen, Hermann Berthelsen, Erik Jensen, Karl-Kristian Kruse, Simon Simonsen kiisalu Anders Olsen.
Inuit Ataqatigiinni suiaassutsit agguataarneranni arnat amerlanerpaapput, tassa qinerneqartunit tallimat arnaapput ukuuppullu Sara Olsvig, Mimi Karlsen, Sofie Geisler, Stine Egede Mikivsuk Thomassenilu.
Demokraatini qinerneqartuni arfinilinni suaassutsit nalingiimmik agguataarsimapput. Qinersinermi 2014-imi Demokraatit qinerneqarneranni agguataarineq aamma taamaapput, tassani sisamanik isertitaqarput, Inuit Ataqatigiillu aqqanilinnik isetitaqarnerannit arfineq-marluk arnaapput sisamallu angutaallutik.
AAMMA ATUARUK Partiit arnanik naalakkersuinermik suliaqarusuttunik amigaateqarput
Partii Naleqqamut Inatsisartuni inissat sisamat angutaannarnik inuttalerneqarput, tassaallutillu Hans Enoksen, Pele Broberg, Henrik Fleischer Jens Napaattoorlu.
Partiit pisoqaanersaasa ilaat Atassut angutaannarnik sinniisussaqarpoq, tassalu Siverth K. Heilmann Aqqaluk Jerimiassenilu. Partiit nutaanersaanni marlunnit Nunatta Qitornaanit Vittus Qujaukitsoq Suleqatigiissitsuniillu Tillie Martinussen qinerneqarnerpaapput.
AAMMA ATUARUK Arnat Inatsisartunut qinigassanngortittut angutinit ikinnerungaatsiartut
