Inatsisartut katersornerat naammasseqqajaalerpoq
Inatsisartut ukiaanerani ataatsimiinnerat naammassingajalerpoq.
Aatsitassanut inatsit, Suliniutinullu angisuunut tunngasunut inatsit eqqaassanngikkaanni, ukiaq manna oqaluuserisassatut naatsorsuussat 120-t missaanniittut naammassineqarsimalerput.
Aalajangiiffigisassatut siunnersuutit suut ilaatigut oqaluuserineqarsimanersut Radioaviisimit qimerluualaarpavut
Allattoq Mads Lynge
novembarip 29-at 2012 09:29
Aappaagumut 2013-imut aningaasanut inatsisissatut siunnersuut aallaarniutigissavarput. Akileraartarnikkut aaqqissuusseqqinneq matumani immikkut taasariaqarpoq.
- Nuna tamakkerlugu akileraartarnerup 11 procentimit 10 procentinut appartinneqarnissaa aalajangerneqarpoq, qalerallit avataasiorluni aalisarnermi pisarineqarsimasut akitsuuserneqarnerisigut tamanna ilaatigut matussuserniarneqarpoq, soorlu aamma biilinut akitsuusiinerit nutaat eqqunneqartut.
- Imigassanik tallimanngornermi arfininngornermilu unnukkut nalunaaqutaq qulingiluat tungaannut pisiniartoqarsinnaalernissaa aamma akuersissutigineqarpoq.
- Meeqqanik kinguaassiutitigut atornerluinermut tunngasunut pisoqalisinnaannginnerannik qulakkeerisumik naalakkersuisut peqquneqarnissaat siunnersuutigineqarportaaq, Pinerluttulerinermullu inatsisip allanngortinneratigut tamanna anguneqarluni.
- Meeqqat atuarfiat pillugu inatsit nutaaq aamma akuersissutigineqarpoq. Meeqqat atuarfianni pitsaassutsip qaffatsinnissaa anguniagaalluni.
- Atuarfiit ukiumoortumik nalunaarusiortalernissaat siunniunneqarpoq, atuartitsinermillu nalilersuisoqartalissalluni, soorlu aamma atualinnginnermiit ingerlaqqilluni ilinniagaqarnermut qaffassaanissap pitsanngorsaanissaa aamma anguniagaasoq.
- Nunatsinni tusilartut ajutoortoqartillugu sms-ikkut 112-imut kalerriisinnaalernissaat pillugu siunnersuut aamma akuerineqarpoq.
- Naalakkersuisut aluminiumik suliniummut tunngatillugu Alcoamik oqaloqatiginninnernik nangitsinissamik sinaakkusiorneqarput.
- Ukioq 2014-ip pinngitsaaliinernut akiuiniarnernut ukiunngortinneqarnissaa akuersissutigineqarpoq, soorlu aamma sapatip-akunneranik pujortarnaveersaarfimmik pilersitsisoqarnissaanik naalakkersuisut peqquneqartut.
- Kalaallit Nunaanni aatsitassap piiarneqarsinnaatitaasup suulluunniit uranimik akuata qaffasinnerpaaffilerneqarnissaa pillugu immikkut ilisimasalinnik arlaannaannulluunniit attuumassuteqanngitsunik suligasuartussanik pilersitsisoqarnissaa aamma aalajangerneqarpoq. Suligasuartussat Inatsisartut aappaagu upernaakkut ataatsimiinnissaannut nalunaarusiaa piareersimassaaq.
- Angajoqqaarsiat aamma ilaqutariit oqilisaasut, meeqqanut paarisaminnut ilaqutaanngitsut minnerpaamik 25-nik ukioqalereersimasuunissat Naalakkersuisut aalajangersaasussanngullugit pisussaaffilerneqarput.
- Innarluutillit pisortani namminersorlutillu inuussutissarsiortuni suliffittaarnissaasa ajornannginnerulernissaa sulissutigineqassaaq.
- Toqujartortut napparsimmaviannik pisariaqartitsineq misissorneqassaaq.
Tassalu inatsisissatut siunnersuutit aalajangiiffigisassatullu siunnersuutit Inatsisartut ukiakkut ataatsimiinneranni akuersissutigineqartut taamalillugit tigulaariffigaagut.
Ukiakkulli ataatsimiinneq ullunik marlunnik suli ilaqqinnikuuvoq.
Aatsitassat pillugit aamma suliat angisuut pillugit inatsisissatut siunnersuutit Inatsisartut decembarip arfernanni arfineq appaannilu isummerfigissavaat.
