Inatsisartut ilaatigut corona, mittarfiit namminiilivinnissarlu oqaluuserigaat

Naalakkersuisut siulittaasuata tallimanngormat ammaanermi oqalugiaataa tunngavigalugu Inatsisartut ullumi oqallimmata sammisat pingasut immikkut sammineqarput, tassa corona, mittarfiit namminiilivinnissarlu ilaatigut eqqartorneqarmata.

Coronavirusip ajornartoortitsinera partiinit tamanit immikkut eqqaaneqarpoq, kisianni aamma mittarfiliornerit namminiilivinnissarlu eqqaaneqarlutik.

Aningaasaqarnermut naalakkersuisup Nunatta Qitornaaneersup Vittus Qujaukitsup partiit ukiaanerani ataatsimiinnissaq sioqqullugu eqqaamaqquvaa coronavirusip ajornartoortitsinera pissutigalugu nunatta aningaasaqarnera imaannaanngitsumik inissisimasoq. Naalakkersuisut siulittaasuata coronavirusimut akiuiniarnermut ukioq manna koruunit milliaartit affaasa missaanniinnissaat ilimagigitsik ammaalluni oqalugiaammini tallimanngormat oqaatigaa.

AAMMA ATUARUK Naalakkersuisut sanaartugassanut sipaarniartut

Piginneqatigiinnut akileraarutip appartinneranut peqataasimanertik Demokraatit nuannaarutigigaat, sulili apparneroqqinnissaa, kissaatigigitsik Nivi Olsenip oqaatigaa. Taassumali aamma oqaatigaa COVID-19-i atuutsillugu tamanna piviusorsiortuunngitsoq, siunissamulli ungasinnermut anguniagaasoq. Nunani allani suliffeqarfinnut unammillernermut nukittorsaataasussaq aammalu Nunatsinnut nunanit allanit aningaasaliiniartunut qammaasuussasoq, taanna oqarpoq.

Kim Kielsen kisimiinngitsoq

Coronavirusip ajornartoortitsinera aamma partiinit illuatungiliuttunit marlunnit Atassummit Suleqatigiissitsisuniillu oqaluuserineqarpoq. Kim Kielsenillu oqalugiarnermini oqaaserisaa ataaseq immikkut maluginiarpaat.

AAMMA ATUARUK Kim Kielsenip ammaalluni oqalugiarnera: Coronap ilungersunartorsiortitsinera, aatsitassat kinguaassiutitigullu atornerluinerit

- Naalakkersuisut siulittaasuata oqalugiaammini ilaatigut erseqqissarpaa, allanik aperisassaqarsimanani, tusagassiuutilli qiviaraanni erseqqilluinnarpoq maarsip sisamaani Atassummiit sukataangaarluta Naalakkersuisut siulittaasuata iliuuseqarnissaanut immersueqataarusulluta nalunaarsimanerput, tamassumallumi kingunitsianngua aatsaat Naalakkersuisut siulittaasuannit covid – 19 pillugu qisuariaatit aallartipput, naak ilaatigut maanna naalakkersuisooqataasunit annertuallaamik ukkatariaqarsorigaluartoq, Atassutip siulittaasua, Aqqalu Jerimiassen oqarpoq.

Suleqatigiissitsisut siulittaasuat, Tillie Martinussen assingusumik isumaqarpoq.

- Cororap ajornartortitsinerani aalajangiiniarnerup ajornarsimanera qularutissaanngilaq. Naalakkersuisulli siulittaasuata aperisassaqarsinnaannginnermik siunersiueqateqarsinnaannginnermillu oqariartuuteqarnera eqqoqqissaanngilaq.

- Akisussaaffik illit kisivit tigumminngilat. Partiit tamattaalluta akisussaaffimmik avitseqatigaatsigit, aamma Danmakimit Savalimmiuniillu ikiuinissamik siunersiorfigineqarnissamillu neqerooruteqarput, soorlu aamma Tunillaassortunik nappaalanersuaqarneranut ataatsimiititaliarsuarmit, corona pillugu aqutsisoqarfimmit, aalisarnermi suliffeqarfissuarnit kiisalu peqqinnissaqarfimmit tamarmiusumit kommuniiniillu tamanit, politiinit ikiuisuniillu allanit tamanit ikiuisoqarsinnaasarpoq, Tillie Martinussen oqarpoq.

Mittarfiit pillugit isumaqatigiinnginneq

Tamatuma saniatigut partiit arlallit mittarfiliornerit oqaluuseraat, tassanilu illuatungiliuttut naalakkersuisoqatigiillu akornanni isumaqatigiinngitsoqartoq tusaaneqarsinnaavoq.

- Mittarfiit sananiarneqartut pillugit toqqammavilersuutaasimasut tamarluinnarmik atorneqarsinnaanerat killilerujussuanngorput, piviusorsiortuujunnaarput, Partii Naleqqameersoq Jens NapãtôK oqarpoq.

Taassuma pilersaarutinik allannguinissaq mittarfinnillu naannerusunik ukkataqarnerunissaq kaammattuutigaa. Maanna mittarfiliortiternerit nunatta aningaasaqarneranut kinguneqartitsinissaannut aarlerinartoqarpallaartoq NapãtôK isumaqarpoq.

Aamma Inuit Ataqatigiit mittarfiliornernut suliap ingerlaneranut ernumassuteqarput.

- Mittarfiit sanaartornerat sinaakkusiunneqartuniit akisuallaalersoq tusarliunneqartalerpoq, kakkannianngikkaluarluni oqarusunnarsilluni – Qanormi oqarpugut. Naalaarumananili tikkuartuinissaq suliallu imarisaanik oqallikkumanani naaperiaaniartunullu akerartuinissaq taamani Naalakkersuisooqatigiinniit toqqarneqarsimammat uggornaq. Pisulli pereerput, qaqinneranulli tunngavigaara ilinniarfigineqarsinnaanissaat neriuutigigatsigu. Tusaraanni ajuallaatigiinnaqinagit sivisuumillu ilassisinnaajunnaarnermik suleqatigiissinnaajunnaarnermillu kinguneqarteqinagit, Múte B. Egede oqarpoq.

Perorsaasut taperserneqartut

Aamma perorsaasut akissarsiaat maanna sammineqaqisut politikerinit oqaluuserineqarput.

- Ilinniartuusimanerli naammangilaq anguniassallungu, akissaatitigulli aamma imminut napatinnissamut pilerornissamullu nammassinnaasariaqarpoq ilinniartuusimaneq, assersuutigalungu Pædagogit medhjælperit qaffaaffigineqarnissaat pisariaqavittoq, ullut kingulliit sammisarput oqariartuutaasorlu, ajunngittumillu alloriarfiussasoq neriuutigalungu suleqataaffigissavarput, Karl-Kristian Kruse oqarpoq.

Aamma Demokraatit assingusumik oqarput. Nivi Olsen ilaatigut ima oqarpoq.

- Demokraatit isumaqarput, pingaarnertut anguniagarisariaqaripput, inuiaqatigiinni perorsaasunik, maani nunami ilinniagaqarsimasunik, tamakkiisumik sulisoqarnissarput. Minnerpaamik tamaaliornissamut pisariaqarpoq, perorsaasunik ilinniartunik tigooqqaanerup annertusineqarnissaa aammalu perorsaasutut sulinerup pilerinarnerulersinnissaa. Perorsaasutut akissarsiat atorfinnut periarfissanut allanut sanilliullugu pilerinarpallaanngilaq, tamannalu pissutaaqataasinnaalluni, inuusuttut ilaasa ilinniagarilerusunneq ajormassuk.

Aamma Inuit Ataqatigiit perorsaasunut tapersersuillutik oqarput, tassalu perorsaasut maanna Namminersorlutik Oqartussanik isumaqatigiinniaqateqartut akissarsiaqarnerulernissaat Inatsisartuni amerlanerussuteqartunit tapersersorneqarpasippoq.