Inatsisartut elektroniskimik ataatsimiissinnaanissaq akerliusoqarfiunngitsumik akuersissutigaat
Ukiakkut ataatsimiinnermi siunnersuut immikkoortoq immikkut ittoq, tassa tuaviortumik ajornartoornermilu elektroniskimik ataatsimiittoqarsinnaanissaa Inatsisartut ullumi oqaluuseraat.
Naalakkersuisut siunnersuuteqartuupput. Siunnersuullu coronap ilungersuatitsinerata nalaani pissutsinut qisuariaatitut siunnersuutigineqarpoq.
2020-mi marsimi inatsit tuaviuussaq akuerineqartussaavoq, tamannali ajornakusoorpoq, Inatsisartunimi ilaasortat amerlasuut Nuummiinngillat illoqarfiillu pingaarnersaata coronap tuniluunnera pissutigalugu matoqqanera pissutigalugu tikissinnaanatik.
Taamaammat ilaasortat Nuummiittut sinniisullu Nuummiittut peqatigalugit aggersarneqarput.
AAMMA ATUARUK Inatsisartut immikkut ittumik ataatsimiinnissaat: Ima iliussasut
Naalakkersuisut siunnersuummut oqaaseqataat naapertorlugu “inuiaqatigiinni inatsisit nukingiussassat ajornartoornermullu tunngasut Inatsisartuni nalinginnaasumik ilaasortaasunit allaanerusunit akuerineqartarunik ajornartoornermi aaqqiineq oqartussaaqatigiinnermut tulluanngilaq”.
Inatsit maanna saneqqunneqarsinnaanngitsoq
Covid-19-ip sanaani pissutsit immikkut ittut siunnersuummut kisimik tunngaviunngillat. Danmarkimi Folketingimut tuaviortumik aggersaanissaq ajornarpallaanngilaq, nunattali angissusaa, nunap ilusaa attaveqaasersuutillu pissutigalugit assingusumik pisoqarneranut ajornakusoortitsisarput.
Inatsisartuni inatsimmi allaqqasoq naapertorlugu Inatsisartut aalajangiisinnaassuseqassappata ilaasortat ikinnerpaamik affaat Inatsisartut ataatsimiittarfianniissapput.
- Piumasaqaat taanna saneqqunneqarsinnaanngilaq, taamaattumillu ajornartorsiulernermi ajunaarnersuaqarneraniluunniit assersuutigalugu angallannerup isasoorfigisimasaani aamma atuulluni, oqaaseqaammi allassimavoq.
Siunnersuut akuerineqassaguni siulittaasoqarfiup suliaq kinguartitassaanngitsumik nalileraangagu elektroniskimik tuaviortumik ataatsimiigiaqqusisoqarsinnaanngussaaq.
Naalakkersuisut oqaaseqaataat naapertorlugu siunnersuut pisortanut aningaasatigut allaffissornikkullunniit kinguneqaataanavianngilaq, elektroniskimimmi ataatsimiinnissamut immikkut ittunik atortorissaarutinik pisoqarnissaa pisariaqanngilaq.
Oqaaseqaalli naapertorlugu pisortat aningaasarpassuarnik sipaaruteqarsinnaassapput, Inatsisartunimi ilaasortat suliamik tuaviuussamik ataasinnguamik oqaluuserinnikkiartorlutik Nuummukarnissaannut ineqartinneqarnissaannullu aningaasartuutaasariaarutissaaq.
Siunnersuut ukiakkut ataatsimiinnerup ulluisa naggataanni tassa ullumi siullermeerneqarlunilu aappassaaneerneqarpoq kiisalu pingajussaaneerneqarluni.