Ataatsimiittarfittaarnissamik siunnersuut aappassaaneerneqassasoq
Ataatsimiittarfittaarnissamillu siunnersuut Inatsisartut ullumi ataasinngornermi aappassaaneerlugu oqaluuserissavaat.
Siunnersuut Inatsisartut aningaasaqarnermut akileraartarnermullu ataatsimiititaliaanni suliarineqarpoq, nutaamillu sanaartornissamut apeqqutit akissutissarsineqanngitsut suli arlaqarneri ataatsimiititaliap isumaliutissiissutimini pingaartillugu allaaseraa.
Ataatsimiititaliap aamma erseqqissaatigaa siunnersuutigineqartoq taama iluseqartillugu akuersissutigineqassappat, Inatsisartut siulittaasoqarfiata sanaartornissamik pilersaarutit naammassillugit suliarineqarnissaannut akuerineqarlunilu sanaartortitsinissamik isumaqatigiissuteqarsinnaassasoq.
Inatsisartut siulittaasoqarfiat taamaalilluni illorsuarmik 100 aamma 190 millionit koruunit akornanna akilimmik sanaartortitsinissamut isumaqatigiissuteqarnissamut periarfissinneqassaaq, illorsuullu atulerneranit ukiuni siullerni 30-ni attartornermut aningaasartuutissat 315-375 millionit koruuniussallutik.
AAMMA ATUARUK Inatsisartut ataatsimiittarfissaata aalajangiiffigineqarnissaa kinguartinneqartoq
Aamma sanaartortoqarneratigut Namminersorlutik Oqartussat aningaasanik taarsigassarsisussaassapput, tamannalu Namminersorlutik Oqartussat allatigut taarsigassarsinissaanut sunniuteqartussaassaaq, ataatsimiititaliaq isumaliutissiissutimini taama allappoq.
Ataatsimiititaliami amerlanerussuteqartut, tassaasut Siumut aamma Inuit Ataqatigiit, siunnersuutigineqartup allannguuteqartinnissaanik siunnersuuteqarput. Inatsisartut siulittaasoqarfiata suliniummut tamarmut, aningaasartuutitassat illorsualiassallu qanoq isikkoqarnissaanut tamakkiisumik allaaserisaqarnissaa amerlanerussuteqartut siunnersuutigaat. Aamma illorsuup maanna piusup nutarterneqarnerata nutaamik sanaartortitsinermut naleqqiullugu pitsaaqutissartai ajoqutissartaalu naliliiffigineqarnissaat siunnersuutigineqarpoq.
Demokraatit ataatsimiititaliami ilaasortaatitaat isumaqarpoq siunnersuut itigartitsissutigineqassasoq aningaasallu inuiaqatigiinni siunertanut allanut atorneqarlutik.
AAMMA ATUARUK Inatsisartut ataatsimiittarfissaat nutaaq ataatsimiititalimi suliarineqassaaq
AAMMA ATUARUK Inatsisartut dropper at behandle ny parlamentsbygning på én dag
