Inatsisartut ataatsimiittarfissaata aalajangiiffigineqarnissaa kinguartinneqartoq
Ataatsimiittarfittaarnissamik suliniut aalajangiusimaneqaannassanersoq taamaatiinnarneqassanersorluunniit isummerfissaavoq, ukiaaneranilu ataatsimiinnermi ullup ataatsip iluani siullermeerneqarlunilu aappassaaneerneqartussaagaluarpoq.
Aningaasat maanna atorneqarnissaat eqquutinngilaq
Tamannali isornartorsiorneqangaatsiaqarpoq, ataatsimiititaliamilu suliarineqarniassammat, aappassaaneerneqarnissaa Inatsisartut upernaakkut ataatsimiinnissaannut kinguartinneqarpoq.
Aamma atuaruk Inatsisartut ataatsimiittarfissaat nutaaq ataatsimiititalimi suliarineqassaaq
Aamma atuaruk Ataatsimiittarfittaassamut siunnersuut ullormi ataasiinnarmi suliariniarunnaarpaat
Nutaamik ataatsimittarfittaarumaneq pillugu oqallinneq sakkortuvoq.
Demokraatit, Atassut aamma Partii Naleraq siunnersuummut akerliupput. Aningaasat isumaginninnermut atorneqarnissaat taakkua kissaatigaat.
Iluarsartuussinissaq akisuvoq
Siumut, ilaatigullu Inuit Ataqatigiit Inatsisartut nutaamik ataatsimiittarfittaarnissaat tapersersorpaat, ataatsimiittarfik iluarsartuuttartariaqartarmat tamannalu akisummat.
Aamma Inatsisartut nutaamik ataatsimiitarfittarpata, taanna takornarianut alutornartuussasoq, illersuisut oqarput. Aamma maanna atatsimiittarfik nunasiaataanermeersuusoq taamaamallu inuiannut namminersulerusuttunut naleqqutinngitsoq, Inuit Ataqatigiinneersoq Ane Hansen oqarpoq.
